Jesús uan tatitanilmej kipanauijkej atauit Cedrón uan ajsikej itech tepet tein itokay Olivos. Panouayaya tajkoyouan uan metstonatoya. Keman ajsikej xochital tein moajsia Getsemaní, Jesús kiniluij: “Nikan ximokauakan uan xiijsatokan”. Ompa, yajki okachi nepakaok uan motankuaketsak. Semi motekipachojtoya uan kitataujtij Jiova: “Maj mochiua motanejnekilis”. Yejua ika Jiova kititanik se ángel maj kiyolchikauati. Satepan, Jesús mokepak kampa yetoyaj itatitaniluan uan kinajsik kochtokej. Yejua ika kiniluij: “¡Xiijsakan! Axkan amo hora nankochtoskej. Ejkokya hora keman nechtemaktitijya ininmako akin nechtauelitaj”.

Ompa, ajsik Judas iniuan miakej takamej akin kiuikayaj espadas uan koujmej. Kimatia kani kiajsis Jesús porin miakpa iuan yajka ompa uan iniuan tatitanilmej. Judas kiniluijka tateuianij ke yejua kinnextiliskia akoni katka Jesús. Yajki kampa yetoya Jesús uan kiluij: “Tamachtijkej”, uan kipitsoj oso kitennamikik. Jesús kiluij: “Judas, ¿tinechpitsoua uan ijkon tinechtemaktia?”.

Jesús panok taixpan uan kintajtanij takamej: “¿Akoni nankitemouaj?”. Yejuan kiluijkej: “Jesús akin kayot Nazaret”. Yejua kinnankilij: “Nejua nejon takat”. Yejuan tsinkiskej uan uetsitoj talpan. Jesús oksepa kintajtanij: “¿Akoni nankitemouaj?”. Uan yejuan oksepa kinankilijkej: “Jesús akin kayot Nazaret”. Jesús kinnankilij: “Namechiluijya ke nejua. Komo ijkon, xikinkauakan nejin takamej maj yakan”.

Keman Pedro kiitak tein panotoya, kikixtij se espada uan kinakaskotonak Malco, akin katka itakeual akin kinixyekanaya tiopixkamej. Sayoj ke Jesús kinakasmatokak uan kipajtij. Ompa kiluij Pedro: “Xikalaki moespada. Porin komo titateuia ika espada, timikis ika espada”. Tateuianij  kikitskijkej Jesús uan kimailpijkej, uan tatitanilmej cholojkej. Satepan, taltikpakneminij kiuikakej Jesús iixpan Anás, se tiopixkat akin ueyichiujkej. Yejua kichiuilij netajtanilmej Jesús uan kititanik ichan Caifás, akin kinixyekanaya tiopixkamej. Sayoj ke ¿toni panok iniuan tatitanilmej?