Jesus naayapostoli ye oya taaguluka okamulonga kaKidron yu uka kOndundu yooholivi. Osha li pokati kuusiku nomwedhi ogwa li gwa toka. Sho ya thiki peyana lyaGetsemane, Jesus okwa ti kuyo: ‘Kaleni mpaka, ne mu kale mwa tonata.’ Okwa humu ko kashona moshikunino, nokwa tsu oongolo. Okwa li a nika oluhodhi olunene nokwa galikana Jehova a ti: “Ehalo lyoye nali gwanithwe.” Opo nduno Jehova okwa tumu omuyengeli kuJesus, e ke mu tse omukumo. Sho a shuna kaayapostoli, okwa adha yatatu yomuyo ya kotha. Okwa ti kuyo: ‘Tonateni! Ndika halyo ethimbo lyokukotha! Ethimbo olya thikana, ndi gandjwe miikaha yaatondi yandje.’

Nziya Judas okwe ya a kwatela komeho ongundu onene yaantu ye na omagongamwele noondhimbo. Okwa li e shi mpoka ta adha Jesus, oshoka oya li haye ya ko naye olundji keyana lyaGetsemane. Judas okwa li a lombwela aakwiita kutya ote ke yu ulukila kutya Jesus ogunipo. Onkee ano, okwa yi u ukilila kuJesus, e ta ti: ‘Muhongi, wa tokelwa po?’ Opo nduno okwe mu thipi. Jesus okwa ti: ‘Judas, oto gwaaleke ndje mokuthipa ndje?’

Jesus okwa hedha kongundu kashona nokwe ya pula a ti: “Otamu kongo lye?” Oyo oya ti: “OJesus Omunasareti.” Opo nduno Jesus okwe ya yamukula a ti: “Ongame nguka!” Aalumentu oya shuna monima e tayi ihata pevi. Jesus okwe ya pula ishewe: “Otamu kongo lye?” Oyo oya ti ishewe: “OJesus Omunasareti.” Jesus okwa ti kuyo: ‘Onde mu lombwele kutya ongame nguka. Etheni aalumentu mbaka ya ye.’

Sho Petrus a mono shoka tashi ningwa po, okwa pweya mo egongamwele, e ta tete ko okutsi kwaMalkus, omupiya gwomuyambi omukuluntu. Ihe Jesus okwa gumu okutsi kwaMalkus nokwe mu aludha. Opo ihe okwa lombwele Petrus a ti: ‘Shuna mo egongamwele lyoye molumpangwa. Ngele owa longitha egongamwele, oto ka sa kegongamwele.’  Aakwiita oya kwata Jesus e taya manga iikaha ye, naayapostoli oya fadhuka po. Ongundu oya fala Jesus kuHannas, omuyambi omukuluntu. Hannas okwa pulapula Jesus nokwe mu tumine kegumbo lyomuyambi omukuluntu, Kajafas. Ihe mbela oshike sha ningilwa aayapostoli?