Jesus no valongwa vae vaile Komphunda yo Mindyambi. Ankho omokati kovinthiki iya ankho kuna omwii. Etyi vehika motyikunino tyo Getsemani, Jesus evepopila okuti: “Kalei pano iya tualeiko tyalunguka.” Konyima Jesus atundu ponthele yavo aikila konongolo. Ehimbika okulikuambela ku Jeova okuti: “Ehando liove lilingwe.” Konyima Jeova atumu oandyu opo ipameke Jesus. Etyi Jesus akondola kovalongwa, evevasi aveho vetatu velele. Evepopila okuti: ‘Pindukei-po! Ou hamuvo wokulala! Onondyale mbange mbukahi nokuya opo mbukhuate.’

Pakala vala katutu Juda ehiki, ukahi komutwe womafualali omanyingi vatyinda omitunga novimuti. Juda ankho utyii opi mavasi Jesus mokonda uhole okuya nae kotyikunino. Juda wapopila omafualali okuti mevekuatesako okuimbuka Jesus. Aviuku pu Jesus ati: “Okamene, Mulongesi’ iya konyima emuhipi ombesu. Jesus ati: ‘Juda ukahi nokumphakula nombesu?’

Jesus apulu omafualali okuti: “Olie mukahi nokuovola?” Avapopi okuti: “O Jesus wo ko Nasale.” Jesus evepopila okuti: “Ndyili pano,” ovalume ava veyekei vaye. Jesus evepulu vali okuti: “Olie mukahi nokuovola?” Avakumbulula vali okuti: “O Jesus wo ko Nasale.” Jesus akumbulula okuti: ‘Nemupopilale okuti ndyili pano. Yekei ovalume ava vende.’

Etyi Petulu amona etyi tyikahi nokueenda-po, apolo-mo omutunga atete okutwi kwa Maluku, omupika womunene nakwa. Mahi Jesus akuate okutwi kuomulume oo ekuhakula. Apopila Petulu okuti: ‘Paka omutunga wove motyilalo. Inkha ulwa nomutunga, tupu monkhi komutunga.’ Omafualali akuate Jesus avemukutu komaoko iya ovalongwa avakahateka.  Avatuala Jesus komunakwa Anasi. Anasi alingi Jesus omapulo omanyingi emutumu kondyuo Yomunene-Nakwa Kaifasi. Oityi tyaenda no no apostolu?