Yesu na bamwe aha ntumwa ze bakaraba omu Ruhanga Kideroni baaza aha Rushozi Zeituuni. Zikaba zaahingura omuri shaaha mukaaga z’ekiro, kandi hariho okwezi. Ku baahikire omu musiri Gesesemaani, Yesu akabagira ati: “Mugume aha, nimureeba.” Yesu akaza omu musiri yaatsimba amaju. Aine obusaasi bwingi, akashaba Yehova ati: “Kibe nk’oku orikwenda.” Bwanyima Yehova akoohereza maraika yaahuumuriza Yesu. Yesu ku yaagarukire aha ntumwa ze, akashanga bashatu aharibo bagwejegyeire. Akabagira ati: ‘Musisimukye. Obu ti bwire bw’okugwejegyera. Obunaku bwangye bw’okuheebwayo omu mikono y’abazigu bangye bwahika.’

Ahonaaho Yuda akaija, ayebembeire abantu baingi baine zaarurara n’ebikoni. Akaba naamanya ahu araashange Yesu ahakuba bakaba bakira kwija omu musiri ogwo. Yuda akaba yaagambiire abaserukare oku araabamanyise Yesu. Akagyenda yaahika ahari Yesu yaamugira ati: ‘Mwegyesa,’ yaamunywegyera. Yesu akamugira ati: ‘Yuda, waandebya orikunwegyera?’

Yesu akarugayo yaababuuza ati: “Nimusherura oha?” Bakamugarukamu bati: “Yesu owa Nazareesi.” Yesu akabagira ati: “Niinye,” kandi abashaija bakagarura ebigyere enyima, baagwa ahansi. Yesu akagaruka yaababuuza ati: “Nimusherura oha?” Bakagaruka baamugira bati: “Yesu owa Nazareesi.” Yesu akabagarukamu ati: ‘Niinye. Murekye aba bagyende.’

Petero ku yaamanyire ekyabaire nikibaho, akasyorayo rurara yaacwaho okutu kwa Maliko, omuhuuku w’omunyamurwa omukuru. Kwonka Yesu akakwata aha kutu kw’omushaija yaamutambira. Bwanyima akagambira Petero ati: ‘Garura rurara yaawe omu kyobati kyayo. Waitisa rurara naiwe orayitwa rurara.’ Abaserukare bakakwata Yesu baamukoma, kandi entumwa ze  zoona zikairuka. Bwanyima abantu bakamutwara ow’omunyamurwa omukuru, Ana. Ana akabuuza Yesu, bwanyima yaamwohereza ow’Omunyamurwa Omukuru Kayaafa. Niki ekyabaire aha ntumwa?