Linmay Jesus tan saray apostol diad Palandey na Saray Olibo ya say dinalan da et diad Lawak na Kidron. Lampas lay pegley-labi ed saman tan malimlimpek so bulan. Kasabi dad hardin na Getsemani, imbaga nen Jesus ed sikara: “Dia kayo ni tan mantultuloy kayon manbantay.” Insan inmarawi daiset si Jesus tan tinmalimukor. Anggano maer-ermen tan aburidon maong si Jesus, impikasi tod si Jehova: “Say linawam so nagawa.” Angibaki si Jehova na anghel ya manpabiskeg ed si Jesus. Nen pinawil nen Jesus iray apostol to, anengneng to ya nanaugip so talora ed sikara. Imbaga to: ‘Bangon kayo! Agkayo dapat onuugip, ta asabi lay oras ya erelen ak na saray mamubusol ed siak.’

Insan sinmabi si Judas ya walad unaan na dakel ya lalakin de-awit na saray espada tan pekpek. Amta to so pakaromogan ed si Jesus ta lanang iran oonla ed sayan hardin. Imbaga la nen Judas ed saray sundalo ya no siopa may angoban to, si Jesus iman. Kanian inasinggeran nen Judas si Jesus tan imbaga to: ‘Maabig ya labi, Managbangat,’ insan to inangoban. Imbaga nen Jesus: ‘Judas, inangoban mo ak pian traidoren ak, awa?’

Inmarap si Jesus ed saray lalaki ya kaiba nen Judas tan tinepet to: “Siopay aanapen yo?” Imbaga ra: “Si Jesus a Nazareno.” Insan imbaga nen Jesus: “Siak man.” Apaatras iray lalaki tan atumba ra. Tinepetan ira lamet nen Jesus: “Siopay aanapen yo?” Imbaga da lamet: “Si Jesus a Nazareno.” Inmebat si Jesus: ‘Imbagak lad sikayo ya siak man. Paulyan yo la sirin irayay kaibak.’

Nen anengneng nen Pedro ya erelen da lay Jesus, anguyos na espada tan tinapyas toy layag nen Malco ya aripen na atagey ya saserdote. Balet pinaabig nen Jesus so layag nen Malco. Insan to imbagad si Pedro: ‘Iyan mo lad kaluban tay espadam. No milaban ka tan mangusar kay espada, ompatey ka  ed espada.’ Inerel na saray sundalo si Jesus tan tinaker day lima to. Batik iray apostol to. Insan inawit na totoo si Jesus ed si Anas ya manunan saserdote. Tinepet-tepetan nen Anas si Jesus tan impaiyakar tod abung nen Caifas ya Atagey ya Saserdote. Balet anto kasi agawa ed saray apostol?