Jesuspish apostolcunapish Olivos urcuta pasashpami Cedrón shuti pugru pambata chꞌimbarcacuna. Ñami chaupi tuta yalli carca. Luna jundami carca. Getsemaní huertaman chayashpaca Jesusca apostolcunataca, ‘caipi saquirichij ama dormiringuichijchu’ nircami. Qꞌuipaca paicunamanta ashata caruyashpami cungurishpa Jehová Diostaca, ‘can munashca shina rurapai’ nishpa llaquilla mañarca. Chaimi Diosca paita animachichun shuj angelta cacharca. Chai qꞌuipaca Jesusca apostolcunapajmanmi tigrarca, paicunaca dormirishcacunami carca. Chaimantami, ‘jatarichij mana dormina horaschu can, ñucata huañuchichun entregajca, ñami cꞌuchuyamucun’ nirca.

Chai ratomi Judasca achca gentecunandij espadacunata, caspicunata apashca chayarcacuna. Jesusca apostolcunandijmi chai huertaman achca cutin rijcuna carca. Chaimantami Judasca Jesús maipi cashcata yacharca. Jesús pi cashcata soldadocunaman ricuchingapajmi Judasca paipajman cꞌuchuyashpa, ‘yachachij ¿allillachu cangui?’ nishpa quijadospi mucharca. Jesusca, ‘Judas ñucata muchashpachu contracunapaj maquipi churangui’ nircami.

Jesusca pairaj cꞌuchuyashpami, ‘¿pitataj mashcacunguichij?’ nijpi, ‘Nazaretmanta Jesustami mashcacunchij’ nircacuna. Paica, ‘ñucami cani’ nircami. Chaimi soldadocunaca huashaman tigrarishpa urmarcacuna. Jesusca cutinmi, ‘¿pitataj mashcacunguichij?’ nishpa tapurca. Paicunapish cutinmi, ‘Nazaretmanta Jesustami mashcacunchij’ nircacuna. Chaipimi Jesusca, ‘ñami cancunamanca ñucami cani nishpa huillani. Pero ñucahuan cajcunataca richun saquichijlla’ nirca.

Chaimi Pedroca espadata llujshichishcahuan sumo sacerdoteta sirvij runapaj rinrinta pꞌitirca. Chaita rurajpimi Jesusca chai runapaj rinrinpi tuparishpa alliyachirca. Jesusca Pedrotaca, ‘cambaj espadata huaquichinapi churai. Espadahuan macanacujcunataca, espadallahuantaj huañuchishcami canga’ nircami. Qꞌuipaca  soldadocunaca Jesusta japishpami maquicunata huatarca. Chaita ricushpami apostolcunaca miticushpa rircacuna. Chai qꞌuipaca Jesustaca sacerdotecunata jatun mandaj Anaspajmanrajmi pusharcacuna. Tapuicunata rurashca huashaca Anasca sacerdotecunata mandaj Caifaspajmanmi Jesusta cacharca. ¿Apostolcunahuanca imashi tucurca?