Jesús paipa apostolcunandi Olivos urcuman rinajushpaca, Cedrón shuti huaicu chimba ladotami yalinajurca. Chaupi tuta yali, luna punchapambami carca. Getsemaní shuti pushtuman Jesús paipa apostolcunandi chayashpaca paicunataca nircami: “Cangunaca, ama puñushpa caipi shuyaichilla” nishpa. Shina nishca jipallami paicunamanda ashata caruyashpa alpapi cungurishpa, ninanda llaquirishpa Diosta cashna mañarca: ‘Ama ñuca munashcata rurapaichu, canba munaita pactachipai’ nishpa. Chaimi Jehová Diosca paipa shuj angelta cachashpa Jesusta animarca. Chai jipaca Jesusca paipa quimsa apostolcuna puñunajujta ricushpami cashna nirca: ‘¿Nachu rijcharia caita ushanguichi?’ Ñucata japingapaj contracunaca ñami shamunajun nishpa.

‘Chashna nijujhuanmi Judas runahuanga, ashtaca runacuna espadacunahuan, caspicunahuan shamunajurca’. Judasca Getsemaní pushtuman tauca viajeta Jesushuan, apostolcunahuanbash rishca caimandami Jesús chaipi canataca ali yacharca. Judasca chai runacunamanga nishcarcami, Jesús pi cajtaca ñucami ricuchisha nishpa. Chaimi ‘Jesuspaman, Judas ñapash quimirimushpa ¿alillachu capangui, Yachachij? nishpa mucharca’. Shina rurajpimi Jesusca nirca: ‘¿Judas, ñucataca muchashpachu japichihuangui?’ nishpa.

Jesusca, paicunapa ñaupajpi shayarishpami cashna nirca: ‘¿Pitata mascanguichi?’ nishpa. Paicunaca nircami: ‘Nazaret pueblomanda Jesustami mascanajunchi’ nishpa. Jesusca cashnami tigrachirca: ‘Ñucami cani’ nishpa. Shina nijpimi paicunaca huashaman suchurishpa urmarca. Chaimi Jesusca cutin tapurca: “Cangunaca, ¿pitata mascanguichi?” nishpa. Paicunaca cashnami nirca: ‘Nazaret pueblomanda Jesustami mascanajunchi’ nishpa. Jesusca cashnami nirca: ‘Ñucamari chai cani nishpa villarcani. Ñucata mascanajushpaca, ñucapa cumbacunataca richun saquichi’ nishpa.

Pedroca ima pasajujta ricushpami espadata surcushpa sacerdotecunata mandajpa sirvij Malco shuti runapaj rinrita muchurca. Chaimi Jesusca “chai runapaj rinripi tacarishpa alichirca”. Chai jipaca Pedrotaca nircami: “Cambaj espadataca, maipi tiajushcapillata churai. Espadahuan macanajujcunaca, espadahuanllatami huañuchi tucunajunga” nishpa. Chaipimi soldadocunaca Jesusta  japishpa maquita huatarca. Chaita ricushpami apostolcunaca pacajushpa calpanajurca. Chai jipaca Jesustaca “Anás shuti curapaj huasimanrami aparca”. Curacunata mandaj Anás shuti runaca Jesusta cutin cutin tapuchishca jipami Caifás runapaman cacharca. Apostolcunahuanga ¿imata pasarca?