О Исус хем о апостолија накхле тари долина Кедрон хем геле ки Маслинско Гора. Накхља екваш и рат, хем ко небо сине пхерди месечина. Кеда ресле ки градина Гетсиманија, о Исус вакерѓа ленге: „Овен акате хем ачховен џангавде“. Пало адава, гело хари подур ки градина хем бешља ко кочака. Сине леске бут пхаро хем молинѓа пе. Ки молитва вакерѓа е Јеховаске: „Нека овел сар со мангеа ту“. Тегани о Јехова бичхалѓа јекхе ангеле те охрабринел ле. Кеда о Исус иранѓа пе ко апостолија, дикхља лен сар совена. Ов вакерѓа: „Уштен! Акана нане о време сојбаске! Ало о време те овав предајмо ко васта мле душманенгере“.

Пало кратко време ало о Јуда, хем леа сине бут мануша кола со сине лен мачија хем кашта. О Јуда џанља кај о Исус тано ки градина соске ов хем о јавера апостолија стално авена сине леа адатхе. О Јуда вакерѓа е војниконге кај ов ка сикавел ленге кој тано о Исус. Адалеске гело џи лесте хем вакерѓа: „Здраво, учителе“, хем пало адава чуминѓа ле. О Исус вакерѓа леске: „Јуда, предајнеа ман ли јекхе чумибаја?“

О Исус иклило англал хем пучља е манушен: „Кас родена?“ Ола одговоринѓе: „Е Исусе таро Назарет“. Тегани о Исус вакерѓа: „Ме сиум адава“. Тегани о мануша цидинѓе пе напалал хем пеле теле. О Исус палем пучља лен: „Кас родена?“ Ола одговоринѓе исто лафенцар: „Е Исусе таро Назарет“. Тегани вакерѓа ленге: „Вакерѓум туменге кај ме сиум адава. Мукхен ме ученикон те џан песке“.

Кеда халило о Петар со овела, икалѓа о мачи хем чхинѓа о кан јекхе манушескоро кова со сине слуга е првосвештеникоске. Ама, о Исус астарѓа о кан лескоро хем сасљарѓа ле. Пало адава, вакерѓа е Петареске: „Мукх о мачи. Ако боринеа тут мачеа, таро мачи ка мере“. О војникија астарѓе е Исусе хем пханле о васта лескере,  а о апостолија нашле. Пало адава, о мануша ингарѓе е Исусе ко главно свештенико, ко Ана. Откеда о Ана испитинѓа ле, бичхалѓа ле ко кхер е првосвештеникоскоро о Кајафа. Ама, со уло е апостоленцар?