Jésus na abazengele ti lo ahon na yâ ti Popo-hoto ti Cédron ti gue na ndö ti Hoto ti akeke ti olive. A yeke na peko ti bê ti bï la, nze asigi kota. Na ngoi so ala si na yaka ti Gethsémané, Jésus atene na ala atene: ‘Ala ku mbi ge, ala lango ape.’ Na pekoni, Jésus ague kete na yâ ti yaka ni na lo sara agenou. Vundu asara lo mingi, lo sambela Jéhovah, lo tene: “Zia a sara ye so bê ti mo aye.” Na pekoni, Jéhovah atokua mbeni ange ti ga ti kpengba Jésus. Na ngoi so Jésus akiri na mbage ti abazengele ti lo, lo wara ala na lango. Lo tene: ‘Ala londo! L’heure ti tene ala lango la ape! L’heure alingbi awe ti tene a zia mbi na maboko ti awato ti mbi.’

Kete na pekoni Judas aga, gbâ ti azo so ayeke na a-épée nga na akeke ayeke na peko ti lo. Lo hinga ndo so lo lingbi ti wara Jésus dä ngbanga ti so ala yeke ga ka na yâ ti yaka ni so mingi. Judas atene na aturugu ni so ni yeke fa Jésus na ala. Lo gue droit na mbage ti Jésus na lo tene: ‘Bara mo, Maître,’ na lo su ngbangba ti Jésus. Jésus atene: ‘Judas, mo kä mbi na sungo ngbangba ti mbi?’

Jésus apusu na devant na lo hunda azo ni, lo tene: “Ala yeke gi zo wa?” Ala tene: “Jésus, zo ti Nazareth.” Lo ngbâ lo kiri tënë na ala, lo tene: “Mbi la,” na akoli ni akiri na peko ala tï na sese. Jésus akiri ahunda azo ni, lo tene: “Ala yeke gi zo wa?” Ala kiri ala tene: “Jésus, zo ti Nazareth.” Jésus akiri tënë na ala, lo tene: ‘Mbi tene na ala so mbi la. Ala zia akoli so ague.’

Tongana Pierre aga ti comprendre ye so ayeke passé so, lo gboto zembe ti lo na lo dë mê ti Malchus, so ayeke ngbâa ti kota prêtre. Me Jésus andu mê ti lo na lo sava lo. Na Jésus angbâ atene na Pierre: ‘Kiri na épée ti mo na place ni. Tongana mo tiri na épée, mo yeke kui nga na lege ti épée.’ Aturugu agbu Jésus na ala kanga maboko ti lo, abazengele akpe.  Na pekoni ala mû Jésus ague na lo na Anne, so ayeke kota prêtre. Anne ahunda tënë na Jésus na lo tokua lo na da ti Kota Prêtre Caïphe. Me nyen la asi na abazengele ni?