Na savavali Iesu ma le ʻauaposetolo i le ālia o Ketarono ma agaʻi atu i le mauga o Olive. O le taimi lea ua teʻa le 12 i le pō ma o loo atoa le masina. Ina ua latou taunuu atu i le togālaau o Ketesemane, na faapea atu Iesu iā i latou: “Ia outou nonofo i inei ma ia faaauau ona mataala.” Ona alu atu lea o Iesu i le togālaau, ma ua tootuli. A o matuā mafatia o ia, na ia tatalo atu iā Ieova: “Ia faia lou finagalo.” Ona auina mai lea e Ieova o se agelu e faalaeiau iā Iesu. Ina ua toe alu atu Iesu i le mea sa iai ona aposetolo, na ia maua ai ua momoe le toʻatolu o i latou. Na fetalai atu o ia: ʻNonofo ia i luga. E lē o le taimi lenei e momoe ai. Ua oo mai le itula e tuuina atu ai aʻu i lima o oʻu fili.’

E leʻi umi ae taunuu atu Iuta, o loo ia taʻitaʻia atu se motu o tagata, ua iā i latou pelu ma pouvai. Na ia iloa le nofoaga e maua ai Iesu, auā e masani ona latou ō atu i lea togālaau. Na fai atu Iuta i fitafita e mafai ona ia faasino atu Iesu iā i latou. Ona savali saʻo atu lea o ia iā Iesu ma faapea atu: ʻTalofa le Aʻoaʻo e,’ ma sogi atu iā te ia. Na tali mai Iesu: ʻIuta, ua e faalataina aʻu i le sogi?’

Ua savali atu Iesu ma fesili i le motu o tagata: “O ai o loo outou saʻilia?” Ua latou tali mai: “O Iesu le Nasareta.” Ona ia fetalai atu lea iā i latou: “O aʻu lenei o ia,” ona solomuli ai lea o tagata ma ua paʻuʻū i le eleele. Ua toe fesili atu Iesu: “O ai o loo outou saʻilia?” Ua latou toe tali mai: “O Iesu le Nasareta.” Na faapea atu Iesu: ʻNa ou fai atu o aʻu lenei. Ia tuu atu nei tamāloloa e ō.’

Ina ua iloa e Peteru le mea o loo tupu, ona ia seʻi aʻe lea o le pelu ma tipiese ai le taliga o Maliko, o se pologa a le ositaulaga sili. Ae ua paʻi atu Iesu i le taliga o le tamāloa ma faamālōlō o ia. Ona ia faapea atu lea iā Peteru: ʻTuu ese lau pelu. Pe afai e te faaaogā le pelu e tau ai, o le a e oti i  le pelu.’ Na puʻe e fitafita Iesu ma saisai ona lima, ae na sosola ese le ʻauaposetolo. Ona ave ai lea o ia e le motu o tagata iā Ana le faitaulaga sili. Ona tuʻifesili lea e Ana o Iesu ma auina atu o ia i le fale o Kaiafa le ositaulaga sili. Ae o le ā ua tupu i le ʻauaposetolo?