Jesus no apóstolu sira laʼo liu husi Foho-Leet Sedron atu bá Foho Oliveira. Kalan-boot ona, no fulan nakonu. Kuandu sira toʼo iha jardín Getsémani, Jesus dehan: ‘Hein iha neʼe no matan-moris nafatin.’ Tuirmai Jesus laʼo dook uitoan no hakneʼak. Nia sente laran-susar, no harohan ba Jeová: ‘Halo bá tuir Ita-nia hakarak.’ Tuirmai, Jeová haruka anju ida atu hametin Jesus. Kuandu Jesus fila fali ba apóstolu sira, nia haree katak sira toba-dukur. Jesus dehan: ‘Hadeer! Neʼe laʼós tempu atu toba! Oras toʼo ona atu ema entrega haʼu ba inimigu sira-nia liman.’

Lakleur Judas toʼo hamutuk ho ema-lubun boot neʼebé lori surik no ai-dona. Judas hatene Jesus iha neʼebé tanba baibain sira bá iha jardín neʼe. Judas fó-hatene uluk ba soldadu sira katak nia sei fó sinál atu hatudu ida-neʼebé mak Jesus. Judas hakbesik ba Jesus no dehan: ‘Mestre’, no tuirmai reʼi Jesus. Jesus dehan: ‘Judas, ó entrega haʼu ba inimigu sira ho reʼi ka?’

Jesus hakat ba oin no husu ba ema-lubun: ‘Imi buka sé?’ Sira dehan: ‘Jesus, ema Nazaré.’ Tuirmai Jesus hatán: ‘Haʼu mak neʼe’, no ema-lubun hakiduk ba kotuk no monu ba rai. Dala ida tan Jesus husu: ‘Imi buka sé?’ Sira dehan: ‘Jesus, ema Nazaré.’ Jesus hatán: ‘Haʼu dehan ona haʼu mak Jesus. Husik haʼu-nia apóstolu sira bá.’

Bainhira Pedro haree katak ema atu kaer Jesus, nia losu ninia surik no sabir amlulik boot nia atan ida naran Malko nia tilun. Maibé Jesus kaer Malko nia tilun no kura nia. Tuirmai Jesus dehan ba Pedro: ‘Hatama fali ó-nia surik. Ema neʼebé kaer surik sei mate ho  surik.’ Soldadu sira kaer Jesus no kesi ninia liman. Apóstolu hotu halai. Tuirmai ema-lubun lori Jesus ba ulun-naʼin amlulik naran Anas. Anas husu pergunta barak ba Jesus no haruka ema lori Jesus ba Amlulik Boot Caifás nia uma. Maibé saida mak akontese ba apóstolu sira?