Jesu abaapostolo bakwe bakayinka kumulonga waKkidroni, uli afwiifwi aChilundu chaMa-olifa. Kwakali akati kamansiku alimwi mweezi wakalizwide. Nibakasika kumuunda wakuGetsemane, Jesu wakababuzya kuti: ‘Amusyaale aano, mulindile.’ Mpawo Jesu wakazwa mpukabakede kuti akakombe. Wakalikataazikene, nkinkaako wakakomba kuli Jehova kati: ‘Akuchitike kuyanda kwako.’ Jehova wakatuma mungelo kuti akasimye Jesu. Jesu naakabweeda nkubakabede baapostolo, wakajana balikoona. Wakati: ‘Amubuke! Eechi tachili chiindi chakoona pe. Chasika chiindi chakuti basinkondoma bandijate.’

Nikwakiinda chiindi chifwiifwi, Judasi wakasika ankamu yabantu bakali amapanga ankoli. Wakalikuzi nkwaakali kunoojana Jesu nkaambo bakalikunoonga bayinka kumuunda ooyo. Judasi wakabuzizye basilumamba kuti wakali kuyoobatondeezya Jesu. Wakayinka kuli Jesu, wati: ‘Wapona Muyiiyi,’ mpawo wakamumyonta. Jesu wakati: ‘Judasi ulikundaaba kwiinda mukundimyonta na?’

Jesu wakayinka nkubakabede baalumi aabo akubabuzya kuti: “Ino nguni ngomuyandaula?” Bakati: “Jesu waku-Nazareta.” Wakati: “Ndime,” mpawo baalumi aaba bakabweeda musule akuwida aansi. Jesu wakababuzya lubo kuti: “Ino nguni ngomuyandaula?” Bakati: “Jesu waku-Nazareta.” Mpawo Jesu wakati: ‘Ndamubuzya kuti ndime. Amubaleke aaba bamwi bayinke.’

Petro naakabona zyakachitika, wakasomona panga lyakwe akununsula kutwi kwaMalikko, mubelesi wamupayizi mupati. Pesi Jesu wakabweedezya kutwi kwamwaalumi ooyo akumuponia. Jesu wakabuzya Petro kuti: ‘Bweedezya panga lyako. Ikuti wabelesya panga uyoojayigwa apanga.’ Basilumamba bakajata  Jesu, akumwaanga kumaboko mpawo baapostolo bakachija. Baalumi aaba bakamutola kumupayizi mupati, Anasi. Anasi wakabuzya-buzya Jesu, mpawo wakati atolwe kung’anda yaMupayizi Mupati, Kkefasi. Pesi niinzi chakachitika kubaapostolo?