Ja Jesús soka sjekabʼanumik wajye man wits Olivo sok ekʼ skʼuts-e ja slomanil bʼa Cedrón. Masxa ja nalan akwali sok yij ay lek ja luna. Yajni kʼotye ja bʼa jardín bʼa Getsemaní, ja Jesús yala: «Ti la kanyex ili sok mok ochuk awayelex». Jaxa Jesús waj och jun makʼe sok koʼ mekʼan. Jelxani chamkʼujol ay xyabʼi sok yayi orasyon ja Jyoba: «Akʼulaxuk ja jastal waxa kʼana». Anto ja Jyoba sjeka jun anjel bʼa stsatsankʼujolajel ja Jesús. Tsaʼan, ja Jesús kumxi ja bʼay ja oxwane sjekabʼanumik sok wane wayel staʼa. Ja yuj yala yabʼye: «¡Kʼeʼanik! Ja wego mi styempoʼiluk wayel. Kʼota ja sjutsʼinil bʼa oj ajukon bʼa skʼabʼ ja jkontraʼiki».

Tixta kʼot ja Judas sok jun niwan tsome winik chapane lek sok espada sok garrote. Snaʼunej lek bʼa oj staʼ ja Jesús yujni wajele ja tiw jitsan ekʼele. Ja Judas yalunej yabʼ ja kʼakʼanumik bʼa yeʼn oj sjeʼ machunkiluk ja Jesús. Tojxta waj ja bʼay ja Jesús sok yala yabʼ: «Saʼan, Maestro», sok yujtsʼan. Ja Jesús yala yabʼ: «Judas, ¿sok jun ujtsʼanel waxa chʼaykʼujolanon?».

Ja Jesús yayi jun xete bʼa stiʼ sat sok sjobʼyi ja winike: «¿Machun waxa leʼawex?». Ti yalawe: «Jaʼa Jesús ja Nazareno». Ja yeʼn sjakʼa: «Keʼnon». Ja yeʼnle kumxi spatike sok mokʼye man luʼum. Ja Jesús cha sjobʼo: «¿Machun waxa leʼawex?». Ja yeʼnle sjakʼawe: «Jaʼa Jesús ja Nazareno». Ja Jesús sjakʼa: «Kala ta wabʼyex keʼnon. Kechan wa xkʼana awajuke ja winike it».

Yajni ja Pedro yila ja jas wan ekʼeli, ya eluk jun espada sok skʼutsuyi ja xchikin ja Malco, jun moso ja bʼa mero olomal sacerdote. Pe ja Jesús syama ja xchikin ja Malco sok stojbʼes. Anto yala yabʼ ja Pedro: «Nolo jawa espada. Yujkʼa wala tiroʼani soka espada, sok espada oj chaman». Ja kʼakʼanumik  syamawe ja Jesús sok smochoweyi ja skʼabʼi, jaxa jekabʼanumik spakawe ajnel. Tixa yiʼaje och ja Jesús ja bʼay ja olomal sacerdote, ja Anás. Ja yeʼn jel jas sjobʼoyi ja Jesús sok tixa sjeka bʼa snaj ja mero olomal sacerdote, ja Caifás. Pe ¿jasa ekʼ soka jekabʼanumiki?