Иисус болгаш элчиннер айдың дүне Кедрон шынаазын таварып, Элеон даанче чорупкан. Гефсиман садынга Иисус элчиннеринге: «Маңаа туруңар база кызып удувайн көрүңер» — деп чугаалаан. Оон ол бичии ырадыр чорупкаш, аажок дүвүреп, Иеговага: «Сээң күзел-сорууң ёзугаар болзун» — деп мөргээн. Ынчан Иегова ону деткиир дээш, ангелин чоргузупкан. Иисус чедип кээрге, элчиннери удуп чыткан. Оон оларга: «Туруңар! Удуур хире үе эвес-тир, дайзыннар ам келгеш, мени тудуп аппаар» — деп чугаалаан.

Удатпаанда хылыштар, ыяштар туткулап алган хөй чонну Иуда эккелген. Иисус элчиннери-биле кады садка турар деп, ол билир турган. Иуда дайынчыларга Иисусту канчаар танып алырын база чугаалап берген. Ол Иисусче дорт баргаш: «Амыр-менди-ле, Башкы!» — дээш, ону ошкап каан. Иисус: «Иуда, сен мени ошкаашкын-биле садарың ол бе?» — деп айтырган.

Иисус мурнунче үнүп келгеш: «Кымны дилеп тур силер?» — деп айтырган. Олар аңаа: «Назарет чурттуг Иисусту» — дээн. Ол: «Мен-дир мен» — деп харыылаан. Олар аткаар баскаш, черже доңгая кээп дүшкеннер. Иисус база катап: «Кымны дилеп тур силер?» — деп айтырган. Олар: «Назарет чурттуг Иисусту» — дээн. Иисус оларга: «„Ол мен-дир мен“ деп силерге чугааладым. Мээң өөреникчилеримни салыптыңар» — дээн.

Пётр чүү болуп турарын билип кааш, хылыжы-биле дээди бараалгакчының чалчазының кулаан одура шаапкан. Ынчалза-даа Иисус ол кижиниң кулаанга дээпкеш, ону экиртип каан. Оон ол Пётрга: «Хылыжың суп ал. Хылыш тудар кижи хылыштан чок боор» — деп чугаалаан. Дайынчылар Иисусту тудуп алгаш, шарып алган.  А элчиннер шупту дезе берген. Оон Иисусту өргээниң улуг бараалгакчызы Аннага эккелген. Анна ону байысаагаш, дээди бараалгакчы Каиафаның бажыңынче чоргузупкан. А элчиннер-биле оон чүү болган?