Te Jesús sok te jpuk-kʼopetik yuʼune bajtʼik ta wits yuʼun Olivoiltik sok kʼaxik ta spamlej kʼinal yuʼun Cedrón. Kʼaxemix ta olil ajkʼabal-a sok syijil-a te ue. Te kʼalal kʼotik ta skʼinal Getsemaní, jich albotik yuʼun te Jesuse: “Jilanik liʼ ini sok wikʼilukme asitik”. Ta patil, te Jesús beenxan bael jtebuk sok la skejan sba. Bayal ay ta mel-oʼtan sok la skʼopon te Jehová: “Akʼa kʼotuk ta pasel te skʼanojel awoʼtane”. Jich yuʼun te Jehová la stikun tal jtul chʼul-abat yuʼun ya yakʼbey yip yoʼtan te Jesuse. Ta patil, te Jesús sujt tal te banti ay te oxtul jpuk-kʼopetik yuʼune, wayalik kʼot sta. Jaʼ yuʼun jich la yaltiklanbey: “¡Wikʼame asitik! Ma yorailuk te ya xwayexe. Kʼotix yorail te ya kichʼ akʼel ta stojol te jkontratake”.

Ta oranax kʼot te Judas sok bayal ta tul winiketik te yichʼojik kʼoel yespadaik sok steʼik. Snaʼoj te banti ya sta te Jesuse, melel bayal buelta tey la stsob sba sok-a soknix te jpuk-kʼopetik tey ta Getsemaní. Te Judas yalojbeyix-a te soldadoetik te jaʼ ya yakʼ ta ilel machʼa-a te Jesuse. Toj bajtʼ ta stojol te Jesús sok jich la yalbey: “Talonme, Maestro”, sok la yujtsʼiy. Te Jesús la yalbey: “Judas, ¿ta swentabal ujtsʼiyel ya awakʼon ta kʼabal?”.

Te Jesús noptsajxan bael jtebuk ta stojol te winiketik sok la sjojkʼoylanbey: “¿Machʼa-a te ya aleike?”. Jich la yalik: “Jaʼ te Jesús te talem ta Nazaret”. Jich la yal te Jesús: “Joʼon-abi”. Jich walakʼpat bajtʼik sok buchik ta lum. Te Jesús la sjojkʼoy ta yan buelta: “¿Machʼa-a te ya aleike?”. Jich la yalik yan buelta: “Jaʼ te Jesús te talem ta Nazaret”. Te Jesús la sut: “La kalix te joʼon-abi. Jich yuʼun akʼa bajtʼukik te winiketik ini”.

Kʼalal te Pedro la yil te bin yak ta kʼoel ta pasele la slokʼes jun espada sok la sbojbey lokʼel schikin te Malco, te jaʼ jtul yabat te mukʼul sacerdotee. Pero te Jesús la spikbey te schikin sok la slekubtesbey. Jich la yalbey te Pedro: “Kʼeja te espada awuʼune. Teme ya awaʼiy  tsalaw sok espada, ta espada ya xlajat”. Te soldadoetik la stsakik te Jesús sok la schukbeyik bael skʼab, yan stukel te jpuk-kʼopetike anik bael. Ta patil, te winiketike la yikʼik bael te Jesús ta stojol te Anás te principal sacerdotee. La spasbey jojkʼoyeletik te Jesús sok la stikun bael ta stojol te mukʼul sacerdote Caifás. Pero ¿bin kʼot ta pasel ta stojol te jpuk-kʼopetike?