Yesu na vhaapostola vho vha vha tshi khou tshimbila Muedzini wa Kidironi vha tshi khou u ya Thavhani ya Miṱwari. Ho vha hu vhukati ha vhusiku nahone ṅwedzi wo tshena. Musi vha tshi swika tsimuni ya Getsemane, Yesu a amba navho a ri: ‘Dzulani henefha nahone ni fhaṱuwe.’ Yesu a fhirela phanḓanyana henefho tsimuni nahone a gwadama nga magona. O ṱungufhala vhukuma, a rabela Yehova a ri: “Kha hu itwe zwine iwe wa zwi funa.” Yehova a rumela muruṅwa uri a ṱuṱuwedze Yesu. Musi Yesu a tshi humela kha vhaapostola, o wana vhuraru havho vho eḓela. A ri: ‘Vuwani! Hetshi a si tshifhinga tsha u eḓela! Tshifhinga tsho swika tsha uri ndi fariwe nga maswina anga.’

Nga u ṱavhanya ha swika Yudasi, o ranga phanḓa mmbi ya maswole yo fara mabanga na dzi thonga. O vha a tshi zwi ḓivha uri Yesu u ḓo mu wana kha yeneyo tsimu ngauri vho vha vha tshi dzulela u ya henefho. Yudasi o vha o vhudza maswole uri u ḓo vha sumbedza Yesu. A ya kha Yesu o mu livha nahone a ri: ‘Hu rini, Mufunzi?,’ nahone a mu khisa. Yesu a ri: ‘Yudasi, naa ni khou nthengisa nga u nkhisa?’

Yesu a sendela tsini nahone a vhudzisa vhathu a ri: “Ni khou ṱoḓa nnyi?” Vha ri: “Yesu wa Nazareta.” A vha fhindula a ri: “Ndi nṋe,” nahone vhenevho vhanna vha humela murahu, vha wela fhasi. Yesu a dovha a vha vhudzisa a ri: “Ni khou ṱoḓa nnyi?” Vha dovha vha ri: “Yesu wa Nazareta.” Yesu a vha fhindula a ri: ‘Ndo ni vhudza uri ndi nṋe. Litshani avha vhanna vha ṱuwe.’

Musi Petro a tshi vhona zwe zwa vha zwi tshi khou itea, a ṱomola banga nahone a tumula nḓevhe ya Malixo, mushumeli wa tshifhe muhulu. Fhedzi Yesu a kwama nḓevhe ya onoyo munna nahone a mu fhodza. Yesu a amba na Petro a ri: ‘Vheani banga ḽaṋu kule. Arali na lwa nga banga, ni ḓo fa nga banga.’ Maswole a dzhia Yesu nahone a mu  vhofha zwanḓa, fhedzi vhaapostola vhawe vha shavha. Gogo ḽa dzhia Yesu ḽa mu isa ha Anania, tshifhe muhulu. Anania a vhudzisa Yesu dzimbudziso nahone nga murahu a mu isa nḓuni ya Tshifhe Muhulu Kayafa. Fhedzi ho itea mini kha vhaapostola?