Yesuusinne kiitettidaageeti Qediroona Wombbaa kanttidi Dabira Zayte Deriyaa kiyidosona. Saˈay bilahe gididi aadhiis; qassi aginay goobaniis. Eti Geetesemaane ataakiltte sohuwaa gakkido wode, Yesuusi etayyo, “Hagan takkishshite; xiskkoppite” yaagiis. Yesuusi ataakiltte sohuwan guuttaa sinttawukko biidi gulbbatiis. I keehi unˈˈettidi, ‘Neeni koyiyoogaadan hano’ yaagidi Yihoowa woossiis. Hegaappe guyyiyan Yihooway Yesuusa minttettanawu issi kiitanchaa kiittiis. Yesuusi kiitettidaageetukko simmidi yiyo wode, eti xiskkidaageeta demmiis. I, ‘Beegottite! Hagee xiskkiyo wode gidenna! Tana ta morkketu kushiyan aattidi immiyo saatee gakkiis’ yaagiis.

Sohuwaarakka, Yihuday bisuwaanne dullaa oyqqidi qohanawu denddida daro asaa kaalettidi puttu giis. I Yesuusa awan demmanaakko erees; ayssi giikko, eti darotoo ha ataakiltte sohuwaa yoosona. Yihuday Yesuusa etawu bessanaagaa wotaaddaratussi yootiis. I sohuwaara Yesuusakko biidi, “Tamaarissiyaagoo, saro de7ai” yaagidi a yeri ekkiis. Yesuusi, ‘Yihudawu, neeni tana yerada aattada immay?’ yaagiis.

Yesuusi sinttawukko hemettidi he daro asaa, “Oona koyeetii?” yaagidi oychiis. Eti, “Naazireeta Yesuusa koyoos” yaagidosona. Qassi i, “Taani a” yaagidi zaarin eti guyye shiiqidi kunddidosona. Haranttuwaa Yesuusi asaa, “Oona koyeetii?” yaagiis. Eti haˈˈikka, “Naazireeta Yesuusa koyoos” yaagidosona. Yaagin Yesuusi zaaridi, ‘Taani a gidiyoogaa intteyyo yootaas. Ha asata yeddite’ yaagiis.

PHeexiroosi aybi haniyaakko eridi, bisuwaa shoddinne qeese ubbatu halaqaa ashkkaraa, Malkkoosa hayttaa qanxxiis. SHin Yesuusi bitaniyaa hayttaa bochidi pattiis. Hegaappe simmidi PHeexiroosa, ‘Ne bisuwaa zaarada wotta. Neeni bisuwan olettikko, bison hayqqana’ yaagiis. Wotaaddarati  Yesuusa oyqqidi a kushiyaa qachin, kiitettidaageeti baqatidosona. Hegaappe guyyiyan, daro asay Yesuusa qeese ubbatu halaqaa Haanna soo efiis. Haanni Yesuusa qoranawu oychidi Qeese Ubbatu Halaqaa Qayaafa soo a yeddiis. SHin kiitettidaageeti waanidonaa?