Yesu ni ŵandumetume ŵakwe ŵajawulaga ku Litumbi lya Maolifi acipitilaga m’ciŵata ca Kidiloni. Paliji pasikati cilo, soni pandaŵijo mwesi waliji uli mkuwoneka wosope. Jemanjaji ali ayice mumgunda wa Getisemane, Yesu ŵasalile ŵandumetumewo kuti, “Mtame apano m’ŵe mesope.” Kaneko Yesu ŵajesile kalutando ni ŵatindiŵele. Mwakulaga mnope nganisyo, jwalakwe jwapopesile kwa Yehofa kuti, “Lisosa lyawo litendekwe.” Kaneko Yehofa ŵatumisye lilayika kuti likamlimbikasye Yesu. Ali awujile kuŵaliji ŵandumetume ŵala, jwalakwe ŵasimene ali mkugona. Yesu ŵatite, ‘Ajimuce! Ajino nganijiŵa ndaŵi jakuti agoneje! Ndaŵi jikwanile jakuti une mbelecedwe m’miyala mwa acimmagongo ŵangu.’

Mwacangakaŵa Yudasi jwayice ali yalumo ni likuga lya ŵandu lili lijigele maupanga ni yimbonga. Jwalakwe jwamanyililaga kwampaka ampate Yesu, ligongo Yesujo jwanonyelaga kwawula ku mgunda wa Getisemanewu. Yudasi ŵaliji ali ŵasalile kala asilikali kuti cacakamucisya kummanyilila Yesu. Jwalakwe jwajawile paŵaliji Yesu ni ŵatite, ‘Moni mwalimu,’ kaneko ŵamkomasisye ni ngomo palijeje. Yesu ŵatite kwa jwalakwe, ‘Ana mkumbeleka une mwakungomasya?’

Yesu ŵajawile capasogolo ni ŵawusisye ŵandu ŵaŵayice kukumkamula ŵala kuti, “Ana akwasaka ŵani?” Jemanjajo ŵatite, “Yesu jwa ku Nasaleti.” Kaneko Yesu ŵatite, “Ndili une.” Kaneko jemanjajo ŵawujile munyuma ni ŵagwile pasi. Yesu ŵawusisyesoni ŵanduwo kuti, “Akwasaka ŵani?” Jemanjajo ŵajanjile kuti, “Yesu jwa ku Nasaleti.” Ni Yesu ŵasalile kuti, ‘Sasile kala kuti ndili une. Ŵalece ŵandumetumeŵa ajawuleje.’

Petulo ali ayiweni yayatendekwagayo, jwaswekwile upanga ni kata liwiwi lya Malikosi. Malikosiju jwaliji jwamasengo jwa jwamkulungwa jwa ŵambopesi. Nambo Yesu ŵajigele liwiwilyo ni kumposya jwalakwejo. Kaneko ŵamsalile Petulo kuti, ‘Msunje upanga wenu. Naga mkukamulicisya masengo upanga, cimciwa ni upanga pewo.’ Asilikali ŵala ŵamkamwile  Yesu ni kumtaŵa makono, kaneko ŵandumetume ŵala ŵatisile. Ŵandu ŵakutumbilaŵa ŵamjigalile Yesu kwa Anasi juŵaliji jwambopesi jwamkulungwa. Anasi ŵam’wusisye Yesu yiwusyo ni ŵamtumisye kunyumba ja Kayafa juŵaliji Jwamkulungwa jwa Ŵambopesi. Nambo ana cici cacatendecele ŵandumetume ŵala?