Jesús yéetel u apostoloʼobeʼ máanoʼob tu táax luʼumil Cedrón tak ka kʼuchoʼob tu Puʼukil le Olivoʼoboʼ. Maas tiʼ chúumuk áakʼab kaʼachi yéetel táan u beetik Luna llena. Ka kʼuchoʼob tu jardinil Getsemanieʼ Jesuseʼ tu yaʼalajtiʼob: ‹Pʼáateneʼex wayeʼ yéetel maʼ a weenleʼex›. Tsʼoʼoleʼ náachchaj junpʼíit tiʼ letiʼobeʼ ka xolaji. Letiʼeʼ jach chiʼichnakchajaʼan kaʼachi ka orarnaj tiʼ Jéeoba: ‹Beetaʼak baʼax a kʼáat›. Jéeoba túuneʼ tu túuxtaj juntúul ángel utiaʼal ka u líiʼs u yóol. Ka suunaj Jesús teʼ tuʼux tu yaʼalaj ka pʼáatak óoxtúul tiʼ u apostoloʼoboʼ tu yilaj táan u weenloʼob. Ka túun tu yaʼalajtiʼob: ‹¡Aajeneʼex! Maʼ u súutukil a weenleʼexiʼ. Tsʼoʼok u kʼuchul u yorail in kʼuʼubul tu kʼab in enemigoʼob›.

Teʼ súutukoʼ kʼuch Judas yéetel yaʼab máakoʼob u machmoʼob espadaʼob yéetel cheʼob. U yojel tiaʼan Jesús tu jardinil Getsemanieʼ tumen yaʼab u téenel bin tu yéetel bey xan yéetel le apostoloʼoboʼ. Judaseʼ tsʼokaʼaniliʼ u yaʼalik tiʼ le soldadoʼob yaan u yeʼesiktiʼob máax Jesús. Letiʼeʼ náatsʼ tu yiknaleʼ ka tu yaʼalajtiʼ: ‹j-Kaʼansaj›, tsʼoʼoleʼ ka tu tsʼuʼutsʼaj. Jesuseʼ tu yaʼalajtiʼ: ‹Judas, ¿yéetel junpʼéel tsʼuʼutsʼ ka traicionartiken?›.

Jesuseʼ waʼalaj tu táan le máakoʼoboʼ, ka tu kʼáatajtiʼob: ‹¿Máax ka kaxtikeʼex?›. Letiʼobeʼ tu yaʼaloʼob: ‹Táan k-kaxtik Jesús le Nazaretiloʼ›. Letiʼeʼ tu núukajtiʼob: ‹Teen le máax ka kaxtikeʼexoʼ›. Letiʼobeʼ suunajoʼob kukulpaachileʼ ka lúuboʼob. Jesuseʼ tu kaʼa kʼáatajtiʼob: ‹¿Máax ka kaxtikeʼex?›. Letiʼobeʼ tu kaʼa aʼaloʼob: ‹Jesús le Nazaretiloʼ›. Jesuseʼ tu núukajtiʼob: ‹Teen, tsʼoʼok in waʼalikteʼex. Le oʼolal chaʼex u bin le máakoʼobaʼ›.

Ka tu yilaj Pedro baʼax táan u yúuchleʼ tu jóoʼsaj u espadaeʼ ka tu kúulxotʼtaj u xikin Malco, le máax meyajtik u maas nojchil le sacerdoteʼoboʼ. Chéen baʼaleʼ Jesuseʼ tu péetsʼkʼabtaj u xikin Malcoeʼ ka tu tsʼakaj. Jesús túuneʼ tu yaʼalaj tiʼ Pedro: ‹Oks a espada teʼ tuʼux ta jóoʼsajoʼ, tumen wa ku meyajtech le espadaoʼ yaan a  kíimsaʼal yéetel espada›. Le soldadoʼoboʼ tu machoʼob Jesuseʼ ka tu kʼaxoʼob u kʼaboʼob, le apostoloʼoboʼ púutsʼoʼob. Ka tsʼoʼokeʼ le máakoʼoboʼ tu bisoʼob Jesús yiknal Anás, u nojchil le sacerdoteʼoboʼ. Letiʼeʼ tu kʼáatchiʼitaj Jesús, ka tsʼoʼokeʼ tu túuxtaj tu yotoch Caifás, u maas nojchil le sacerdoteʼoboʼ. Chéen baʼaleʼ, ¿baʼax túun úuch yéetel le apostoloʼoboʼ?