I kare ma Yecu onongo tye kacel ki lukwenane i rum ma malo-ni, en owaco botgi ni: ‘I dyewor man, wun ducu wubiweka woko liyak.’ Petero odok iye ni: ‘Kadi ka jo mukene ducu gubiweki woko, ento an pe abiweki matwal.’ Ento Yecu owaco bot Petero ni: ‘Ma nongo twon gweno peya okok, ibikwera woko tyen adek.’

I kare ma lumony gutero Yecu i ot pa Kayapa, pol pa lukwena gungweco woko. Ento lukwena aryo gumedde ki lubo kore i kin lwak. Ngat acel i kingi obedo Petero. En odonyo wa i dyekal pa Kayapa ci obedo ka oyo mac. Anyaka mo ma latic pa lalamdog madit oneno wang Petero ci owacci: ‘An angeyi! In onongo itye kacel ki Yecu!’

Petero owacci: ‘Ku! Pe bene aniang gin ma itye ka lokone!’ En ocako wot kun kemo dog cel. Ento anyaka mukene ma latic onene ci owaco ki lwak ni: ‘Laco-ni onongo bene tye kacel ki Yecu!’ Petero owacci: ‘An pe angeyo Yecu!’ Laco mo dok owaco ni: ‘In i ngat acel i kingi! Kit ma iloko kwede nyutti woko ni in Lagalilaya, calo Yecu.’ Ento Petero okwonge ni: ‘An pe angeyo dano man!’

I cawa meno cutcut, twon gweno okok. Petero oneno ka Yecu lokke ci nene. Wiye opo i kom lok pa Yecu ci okato woko, ocako koko matek.

I kare ma jami magi timme, Lukiko pa Lujudaya gucokke kacel ka pido i kom Yecu i ot pa Kayapa. Onongo dong gumoko tamgi me neko Yecu woko, kun pud gitye ka yenyo lok mo i kome. Ento pe gumedo ki nongo lok mo. Lacen dong, Kayapa openyo Yecu atir ni: ‘In aye i Wod pa Lubanga?’ Yecu ogamo ni: ‘An aye a Wode.’ Kayapa owaco ni: ‘Pe dong wamito caden mo. Oyeto Lubanga!’ Lukiko oye lokke kun giwaco ni: ‘Laco-ni myero oto.’  Gubapo lem Yecu, gungulo laa i kome, guumo wange, ci gudonge kun giwaco ni: ‘Ka in lanebi, tuci! Anga mugoyi?’

I kare ma piny oruu, gutero Yecu i ot cokke pa Lukiko ci gupenye dok aye ni: ‘In i Wod pa Lubanga?’ Yecu ogamo ni: “Wun wuwaco ni an a en.” Guwaco ni en oyeto Lubanga ci gutere i gang kal pa Pontio Pilato, ma obedo gabuna me Roma. Gin ango mutimme i ngeye? Kong wanen.