Tingki mangarayahon Paska Jesus dohot angka muridna, didok Jesus do tu nasida, ‘Borngin on, sude do hamu maninggalhon ahu.’ Didok si Petrus ma, ‘Nang pe sude maninggalhon ho, alai ndang hutinggalhon ho.’ Alai didok Jesus ma tu si Petrus, ‘Ndang martahuak dope manuk, nunga tolu hali didok ho na so ditanda ho ahu.’

Tingki diboan angka tentara i Jesus tu jabu ni si Kayapas, adong dua muridna na mangihuthon sian pudi. Sada sian nasida, i ma si Petrus. Alai murid na asing i, lari do maninggalhon Jesus. Diihuthon si Petrus do Jesus sahat tu alaman ni si Kayapas. Tingki hundul si Petrus di lambung ni api, adong ma sahalak borua na mandok, ‘Hutanda do ho! Dongan ni Jesus do ho kan?’

Didok si Petrus ma, ‘Daong! Ndang huboto aha maksudmu!’ Laho ma si Petrus sian lambung ni api i. Alai adong ma muse na mandok tu ibana, ‘Dongan ni Jesus do on!’ Didok si Petrus ma, ‘Ndang hutanda ise Jesus!’ Dung i, adong ma muse baoa na mandok, ‘Muridna do ho kan? Huboto do sian Galilea ho. Logatmu pe, songon Jesus do.’ Alai marsumpa ma si Petrus, ninna ma, ‘Ndang hutanda i!’

Dung i, martahuak ma manuk. Diida Jesus ma si Petrus. Gabe diingot si Petrus ma hata ni Jesus. Dung i laho ma si Petrus huhut tangis.

Marpungu ma anggota ni Sanhedrin di jabu ni si Kayapas. Dilului ma sala ni Jesus asa boi dihukum mate ibana. Alai ndang adong dapot ni nasida. Ujungna, disungkun si Kayapas ma Jesus, ‘Anak ni Debata do ho?’ Didok Jesus ma, ‘I do.’ Dung i didok si Kayapas ma, ‘Ndang porlu be bukti, nunga tabege diparoa-roa ibana Debata.’ Sahata ma nasida laho manguhum mate Jesus. Dipastap nasida ma  Jesus, ditijuri, ditutup matana, jala dipukkuli. Didok nasida ma, ‘Molo panurirang do ho, paboa ma jo ise na mamungkul ho!’

Marsogotna i, diboan ma Jesus tu pengadilan ni halak Jahudi. Disungkun nasida ma Jesus, ‘Anak ni Debata do ho?’ Dialusi Jesus ma, ‘I do!’ Dung i, didok nasida ma nunga dileai Jesus Debata. Diboan nasida ma Jesus tu si Latus, Gubernur ni Rom. Aha do na masa dungkon i? Taida ma.