Kɛ Zezi nin i akoto mun be o nglo sua’n nun lɔ’n, Zezi seli be kɛ: ‘Amun kwlaa amún wá wánndi min andɛ kɔnguɛ.’ Sanngɛ Piɛli tɛli i su kɛ: ‘Kannzɛ be kwlaa be yaci wɔ’n, n liɛ’n n su yaciman wɔ le.’ Zezi seli Piɛli kɛ: ‘Ka naan akɔɲinman kun w’a bo’n, á wá sé kpɛ nsan kɛ a siman min.’

Kɛ sonja mun bé fá Zezi kɔ́ Kaifu i awlo lɔ’n, nn i akoto mun be dan lika b’a wanndi. Sanngɛ be nun nɲɔn be suli be nga be su fa Zezi kɔ’n be su. Be nun kun yɛle Piɛli. Ɔ ɔli Kaifu i awlo lɔ wie, kpɛkun ɔ ko trannin sin kun wun lɛ. Kɛ Piɛli tɔ́n sin’n, junman difuɛ bla kun wunnin i. Yɛ ɔ seli Piɛli kɛ: ‘N si wɔ! A o be nga be su Zezi su’n be nun wie!’

Piɛli seli kɛ: ‘Cɛcɛ, n nunman be nun wie. N siman sa nga ti yɛ a se sɔ’n bɔbɔ.’ Kɛ Piɛli fíte m’ɔ juli anuan’n i wun lɔ’n, junman difuɛ talua kun ekun wunnin i. Ɔ seli sran mun kɛ: ‘Bian nga su Zezi su wie.’ Piɛli tɛli su kɛ: ‘N siman Zezi bɔbɔ.’ I sin’n, bian kun kusu seli kɛ: ‘Nanwlɛ, a o be nun wie. Afin ɔ ijɔlɛ wafa’n kle kɛ a fin Galile kɛ Zezi sa.’ Sanngɛ Piɛli seli kɛ: ‘N simɛn i!’

Kɛ ɔ yoli sɔ cɛ’n, yɛ akɔɲinman kun boli-ɔ. Zezi kpɛli i ɲin niannin Piɛli. Yɛ Piɛli i wla kpɛnnin ndɛ nga Zezi kan kleli i’n su-ɔ. Ɔ fiteli gua su lɔ ko sunnin kpa.

Zuifu mun be Jɔlɛ difuɛ dandan mun be nuan sɛli su kɛ bé kó dí Zezi i jɔlɛ Kaifu i awlo lɔ. Be waan bé kún Zezi, sanngɛ be su kunndɛ sa nga bé jrán su naan b’a kun i’n. Sanngɛ be wunman sa trele nga bé jrán su’n. I agualiɛ su’n, Kaifu usali Zezi kɛ: ‘?A ti Ɲanmiɛn i Wa?’ Ɔ tɛli i su kɛ: ‘Ɛɛn.’ Yɛ Kaifu seli kɛ: ‘?É klé e wun yalɛ é kúnndɛ lalofuɛ ekun? W’a saci Ɲanmiɛn dunman!’ Ɔ maan jɔlɛ difuɛ mun be seli kɛ: ‘Ɔ nin kunlɛ fata!’  Be kpacili Zezi i ɲrun nun, be tili be nuan nzue tɛli i wun. Be kɛtɛli i ɲinma mun, kpɛkun be boboli i acɔliɛ, yɛ be seli i kɛ: ‘Sɛ a ti Ɲanmiɛn nuan ijɔfuɛ sakpa’n kle e sran ng’ɔ boli wɔ acɔliɛ’n.’

Kɛ aliɛ cɛnnin’n, be fɛ i ɔli Zuifu mun be Jɔlɛ difuɛ dandan mun be ja su, kpɛkun be usɛli i ekun kɛ: ‘?A ti Ɲanmiɛn i Wa sakpa?’ Zezi tɛli be su kɛ: ‘Yɛ amun nuan o su lɛ-ɔ.’ Be waan Zezi w’a saci Ɲanmiɛn dunman. Kpɛkun be fɛ i ɔli Pɔnsu Pilati m’ɔ ti Rɔmun siefuɛ’n i awlo lɔ. ?I sin’n, sa benin yɛ ɔ juli-ɔ? Maan e nian.