Fyor Yesus kuker manfamyan ḇyesya skoro sim ḇero bo ro Yerusalem ani, Yesus ikofen ḇe si, ’Roḇ ine, nari mkokam mkobur ḇesisye aya.’ Petrus doḇe, ’Sia sifrur rarirya ḇape ayama na yafur rairyaḇa.’ Mboi Yesus ikofen, ’Fyor mankokor oso dor ḇaim, nari famyun aya kali rikyor.’

Fafisu prajurit sun Yesus i ḇe Kayafas rum ḇyeja, manfamyan ḇyesine sibur ḇesisye kwar. Ḇape manfamyan risuru suso kawasa ansya. Oser ya iso Petrus i. Syun ḇe Kayafas rum ḇyedi ḇarpondi ma idapen. Bin oso myam i ma ikofen, ’Yafawi au kwar! Auma Yesus bati ḇyedisau!’

Petrus doḇo, ’Aroba! Imbude mam sasar snonkaku oso!’ Ramnai, imbran ḇe kedwa ḇeba ani. Inja, bin oso wer myam i ma ikofen ḇe snonkaku sya, ’Snon inema Yesus bati ḇyedirya!’ Petrus ikofen, ’Yamambir Yesus i ḇa!’ Snon oso dakkofen, ’Auso Yesus manfamyan ḇyedi oso! Yarower ro mkaren bedi, yafawi auso snonkaku Galilea raris Yesus i.’ Ḇape Petrus fyores, ’Yamambir i ḇa kaku!’

Fafisu anya ḇeri mankokor oso dore. Petrus ifawi Yesus pyambar fa myam i. Iswarepen Yesus wos ḇyani, inja syae ḇe ḇondi ḇo ḇyesneso kaku ma kyanes.

Fafisu ani, anggota Sanhedrin sya sfanjur fa semankara Yesus i ro Kayafas rum ḇyedi. Sanhedrin iso Kankain Karkara Agama Yahudi ma manfarkin agama siso ḇero diansya. Imbe smun Yesus i, inja sisewar nyan insama sifrur aw sedine. Ḇape sisrow sasar oso ḇaḇeri ro Yesus i. Mura, Kayafas ifuken ḇe Yesus i, ’Auso Allah Rumkun Ḇyedi sau ke?’ Yesus kyarem, ’Imbo.’ Kayafas doḇe, ’Kofandun bukti nower ba. Kyoryae  Allah I kwar!’ Simarisen insama Yesus imar monda. Sḇaseri, saninef i, sidwarek mkamor ḇyesuya, ma sipreri ḇo sikofen, ’Nabi risau ido, wakofenḇair ḇe inko mansei ḇemun au i!’

Meser ya, sun Yesus i ḇe moḇ semankara i ma sifuken i wer, ’Auso Allah Rumkun Ḇyedi sau ke?’ Yesus kyarem, ’Imbo imnis ra wos mkokofen na.’ Soḇe ifrur sasar snaro kyoryae Allah I kwar. Mura, sun i ḇe gubernur Romawi, Pontius Pilatus rum ḇyedi. Rosai ḇeḇejadi wer ya? Rwama kosewar nabor syadi wer.