Vbe Jesu kevbe avbe ukọ ọghẹe rre egedege nii, Jesu keghi tama iran wẹẹ: ‘Wa hia gha lẹẹ sẹ mwẹ rae vbe asọn na.’ E Pita na wẹẹ: ‘Awua! Iran nikẹre gha dobọ sẹ ruẹ rae, mẹ i khian sẹ ruẹ rae.’ Sokpan Jesu keghi tama e Pita wẹẹ: ‘Vbene ọkpa te viẹ, u gha siẹn mwẹ igba eha.’

Vbe ẹghẹ ne ivbiyokuo ya mu Jesu gha rrie owa e Kaiafas, avbe ukọ ọghe Jesu nibun na lẹẹ fua. Sokpan eva vbuwe iran keghi lele ẹbu emwa ni do mu Jesu gha rrie owa e Kaiafas. Ọkpa vbe iran kegha re Pita. E Pita keghi gberra ghee otọ ẹghodo vbe owa e Kaiafas, ne ọ ya ye egbe ghaa erhẹn. Ọvbokhan okhuo ọkpa ghi bẹghe Pita, ọ na tama rẹn wẹẹ: ‘I wa rẹn ruẹ! U ghaa lele Jesu khian!’

E Pita keghi kha wẹẹ: ‘Ẹn o, ẹi re imẹ! I ma zẹdẹ rẹn emwi ne u guan kaẹn!’ Ẹre Pita na ghi gberra ghee odẹ onurho. Vbe ọ ma he kpẹẹ vba, ọvbokhan okhuo ọvbehe keghi bẹghe Pita. Ọ na gha tama emwa wẹẹ: ‘Okpia na, vbe gha lele Jesu khian!’ E Pita na kha wẹẹ: ‘I ma rẹn Jesu hiehie!’ Okpia ọkpa keghi kha wẹẹ: ‘Ọkpa vbe iran ni lele Jesu khian ẹre uwẹ wa khin! Vbene u ya guan rhie ẹre ma wẹẹ, Ovbi e Galili ẹre u khin vbene Jesu vbe ye.’ Sokpan, e Pita keghi vẹn ihẹn yọ wẹẹ, irẹn ma rẹn Jesu.

Vbe ọwarọkpa nii, ọkpa keghi viẹ. Vbe aro e Pita ghi dekaan ọghe Jesu, e Pita na ghi yerre emwi ne Jesu tama rẹn. Ẹre Pita na ghi ladian ya viẹ egbe ẹre rua.

Vbe ẹghẹ na kha na, emwa ni rre iko e Sahẹndrin kegha so uma ọghe vbene iran khian ya buu ohiẹn gbe Jesu hẹ vbe owa e Kaiafas. Agharhemiẹn wẹẹ, iran ta mu olọ yan rẹn nẹ wẹẹ, iran gha gbe Jesu rua, iran kegha gualọ emwi ne iran khian mu na. Sokpan iran ma miẹn eke la Jesu re. Iran ghi zẹ gbe ẹre yo gbe ẹre rre, e Kaiafas na ghi nọ Jesu wẹẹ: ‘Ovbi Osanobua ẹre uwẹ khin ra?’ Jesu keghi wanniẹn ọnrẹn wẹẹ: ‘Ẹre I khin.’ E Kaiafas na kha wẹẹ: ‘De osẹ ọvbehe ne ima ye gualọ yi? Ọ rhooro!’ Ẹre emwa ni rre iko e Sahẹndrin na ghi kha wẹẹ: ‘Wa gia gbe  okpia na rua.’ Iran keghi suẹn gha gbe Jesu. Iran gbe ẹre ubi, iran gie asẹn yan rẹn, iran na vbe gbalọ ọre aro. Iran na gha nọ rẹn wẹẹ: ‘Adeghẹ akhasẹ ẹre u gele khin, tama ima, ọmwa ne ọ fi ruẹ emwi!’

Ẹdẹ ghi gbe, iran keghi mu Jesu gha rrie Sahẹndrin. Iran na werriegbe nọ Jesu wẹẹ: ‘Ovbi Osanobua ẹre uwẹ khin ra?’ Jesu keghi wanniẹn iran wẹẹ: ‘Wa ya unu uwa tae nẹ.’ Ẹre iran na ghi buu ohiẹn gbe ẹre wẹẹ, ọ rhooro. Iran keghi muẹn gha rrie ẹguae ọghe Pọntiọs Pailet nọ ghaa re ọka arriọba ọghe Rom. De emwi nọ ghi sunu? Gi ima ziro yan rẹn sayọ.