Éyoñe Yésus ba minlômane mié be nga to si tawôlô be ja’ak, a nga jô be na: ‘Mia bese mia ye li’i ma étam alu di.’ Pierre na: ‘Sa ma! Ja’a bôte bese ba li’i wo étam, ma ye li’i wo étam môs éziñ.’ Ve Yésus a nga jô Pierre na: ‘Ôsusua na nnôme kup a loñ, wo ye kate ma biyoñ bilal.’

Éyoñe bezimbi be nga kee Yésus nda Caïphe, abui minlôman é nga tup. Ve minlôman mibaé mi mbe nsamba bôt ô nga tôñe Yésus be Caïphe. Wua ya été a mbe Pierre. A nga nyiine nseñ ya nda Caïphe, a taté fe na a wobane nduan. Ane mbo ésaé minga a nga yeme Pierre, a jô nye na: ‘Ma yeme wo! Ô mbe a Yésus!’

Pierre a nga jô nye na: ‘Teké’é, a nji bo ma! Ma yeme ki môte wo jô nye!’ Ane a nga kui nseñ. Ve mbo ésaé minga mfe a nga yeme nye, a jô bôte be mbe valé na: ‘Môte nyi a mbe a wulu’u a Yésus!’ Pierre nye’e na: ‘Ma ve’ele ke yeme Yésus!’ Ane môt éziñ a nga jô nye na: ‘Ô ne wua ya be be! Fatane nkobô jôé ja liti na ô ne môte ya Galilée, ane Yésus.’ Ve Pierre a nga jô na: ‘Ma jô na ma yeme ki nye!’

Éyoñ éte ébien, nnôme kup a nga loñ. Ane Pierre a nga yene Yésus a fombô’ô nye. Nde a nga simesane mejô Yésus a nga jô nye; ane a nga kui nseñ, a ke yôn.

Awolo te ebien, bôte ya Sanhédrin be nga tyi’i na be kee ajô Yésus be Caïphe. Ane be nga taté na ba jeñ beamu ya wôé nye. Ve teke ajô éziñ be mbe ve bôte nye. Ane Caïphe a nga sili nye na: ‘Ye ô ne Mone Zambe?’ Yésus a nga yalane nye na: ‘Ôwé.’ Caïphe a nga jô nye na: ‘Mi ngenane mi yi jé? Ke miabebien mi lôô na a biasé Zambe!’ Ane bôte ya Sanhedrin be nga jô na: ‘Môte nyi a yian awu.’ Ane be nga taté na ba di’i nye bekpwasa  memañ, be lume’e nye bikuta, be tui nye menden asu, be jô’ô na: ‘Nge ô ne nkuli mejô, kate’e bia za a te bibi wo!’

Éyoñe tyé é nga lende, be nga beta kee Yésus e Sanhédrin, ane be nga sili nye na: ‘Ye ô ne Mone Zambe?’ Yésus a nga jô be na: ‘Aval mia jô le.’ Ane be nga yene na a biasé Zambe abui, nde be nga kee nye nda Pilate, njô bôte ya Rome. Jé é nga bobane mvuse ya valé? Jam bia zu yene le.