REIREI 89
E Kakeaa Iesu Betero
Ngke e mena Iesu ma ana abotoro n te ruu are i eta ao e taku nakoia: ‘Ane kam na bane ni kitanai n te tairiki aei.’ E taku Betero: ‘Tiaki ngai! E ngae ngkana a bane ni kitaniko naakai, ma N na bon aki kitaniko.’ Ma e taku Iesu nakoni Betero: ‘Ane ko na kakeaai tenua te tai imwain tangin te moa.’
Ngke a kaira Iesu nakon ana auti Kaiaba taian tautia ao a a birinako angia abotoro. Ma uoman i buakoia a ririmwin te koraki ae bati. Temanna i buakoia boni Betero. E nakon ana katawanang Kaiaba ao e kaabuea i rarikin te ai. E nora ubuni Betero te toro ae te teinnaine n ootan te ai ao e taku: ‘I kinako! Bon raon Iesu ngkoe!’
E taku Betero: ‘Tiaki! I aki ota n te bwai ae ko taekinna!’ Ao e otinako nakon te mataroa. Ma e a manga noria te teinnaine riki temanna ae te toro ao e tuangia te koraki ni kangai: ‘Bon raon naba Iesu te mwaane aei!’ E taku Betero: ‘I bon aki kinaa Iesu!’ Ao e taku te mwaane temanna: ‘Bon temanna naba ngkoe mai buakoia! I kona n ataia ae kaaini Kariraia ngkoe bwa e oti n am taetae, n aron Iesu.’ Ma e tuea Betero ni kangai: ‘I aki kinaa teuanne!’
N te tai anne ao e a tang naba te moa. Ao Betero e nora Iesu bwa e tanrikaaki n taraia. E uringi ana taeka Iesu, ngaia are e a otinako ao e korakai n tang.
N te tai anne, a botaki kaain te Tanirim bwa a na boowia taekan Iesu n ana auti Kaiaba. A a kamani motikia bwa a na tiringa Iesu, ao ngkai a a ukoukora bukinana. Ma e aki roko n te reke. N tokina e a bon titirakinaki Iesu irouni Kaiaba ni kangai: ‘Natin te Atua ngkoe?’ E taku Iesu: ‘Eng.’ Ao e taku Kaiaba: ‘Ti a aikoa kainnanoa riki te bwai ni kakoaua. Bon te taetae ni bakannatua aei!’ Ao a boonnano iai taani boowi ao a taku: ‘E riai ni mate te mwaane aei.’ A karetabaa Iesu, a bawareia, a rabuna matana, ao a oreia ao a taku: ‘Ngkana te burabeti ngkoe, ao tuangira bwa antai ae oreiko!’
Ngke e a ngaina, a kaira Iesu nakon aia ruu ni boowi kaain te Tanirim ao a a manga titirakinna ni kangai: ‘Natin te Atua ngkoe?’ E kaekaia Iesu ni kangai: ‘Ane kam a bon taekinna bwa boni ngai.’ Ao a a kunea bwa e bure ngke e taetae ni bakannatua ao a a kairia nakon ana baareti Bontio Birato, ae te kowana n Rom. Tera ae riki imwina? Ti na noria.
“E a kan roko te aoa . . . ae kam nangi maenako iai n tatabemaningkami nako nakon oin ami auti ao kam nang katukai n tii ngai. Ma tiaki tii ngai, ibukina bwa raou te Tama.”—Ioane 16:32
Ko Bae Naba n Tangira
IESU—TE KAWAI, TE KOAUA, AO TE MAIU
E kairaki Iesu nakon Annati ao imwina nakoni Kaiaba
E kamangaoaki te kaetitaeka ae riai ni motikan taekan Iesu.
IESU—TE KAWAI, TE KOAUA, AO TE MAIU
Kakeaana n Ana Auti Kaiaba
E kangaa ni waekoa n tannako mairoun Iesu, Betero ae te mwaane ae iai ana onimaki ao ana tangira?
IESU—TE KAWAI, TE KOAUA, AO TE MAIU
Kaboowiana n te Tanirim ao Kairana Nakoni Birato
A kaota raoi nanoia mataniwin te Aro.
