Soʼu tü ekawaa aipaʼajatkat nutuma Jesuu, müshi nia namüin na aluwataaushiikana: «Oʼuneena jia jüpüshuaʼa tamaʼanajee soʼu aikat tüü». Nusoutaka Pedro nümüin: «Mayaashiijeʼe napüteechin pia na waneinnua, nnojoireejaʼa tapütüinjachin pia pümüiwaʼa». «Süpülapünaa niʼyalajüin wanee kaliina soʼu aikat tüü, apünüintueechi taya puunjulajüin achiki sünain piʼraajüin taya», nümaka Jesuu nümüin.

Wanaa sümaa nümaanüin Jesuu natuma na surulaatkana nipialuʼumüin Caifás, aʼwalakajaashii na aluwataaushiikana. Piamashii neʼe na apütaakana, noʼunaka süchiirua tü wayuukalüirua. Wane nia Pedro. Ekerotushi Pedro süpaatiaseruʼu nipia Caifás jee nürütkaaka sünainmüin wanee siki süpüla naatulajüin. Süka chuwatüin tü sikikat, niyaawatünaka Pedro sutuma wanee achepchiee. «Teʼraajüin pia. Pia wanee wayuu nümaapuʼukai Jesuu», sümaka nümüin.

Nusoutaka Pedro sümüin: «Paʼalain neʼe, nnojoishi teʼraajüin chi pümakai tamüin». Nukoyotka Pedro sünainmüin tü puettoʼukot. Shiasaʼa mapa, shiirakaaka wanee jiet aʼyataat nümüin chi laülaashikai. «Aashin piayaain wanee nütünajut chi wayuu ataʼünnakai», sümaka nümüin Pedro. Nusoutaka Pedro shiʼipajee: «Nnojo, nnojoishi teʼraajüin chi wayuu püküjakai achiki tamüin». Nümaka joo wane wayuu nümüinya: «Piaʼaya wanee nümaapuʼukai chira wayuukai. Wayaawatüin pia sünainjee tü pünüikikat, süka saashajaayain wayuu Galileajeejatü tia». Nümaka Pedro namüin. «Nnojottaa, nnojoishi teʼraajüin chira wayuukai».

Akootoleʼeraja müshijaʼa joo wanee kaliina. Niasaʼa Jesuu nujununtaaka sünain eirakawaa nümüin Pedro, sotoka naaʼin Pedro tü nümakat Jesuu paala nümüin. Nujuʼitaaka Pedro yalejee yala sünain mojuin maʼin naaʼin sünain niʼyalajashaanain.

Jee yaa paülüʼü suluʼu nipia Caifás, outkajaashii na laülaashiikana suluʼu tü kanüliakat Sanedrín süpüla naashajaajiraain süchiki tü naaʼinrajatkat nüka Jesuu. Süka noʼuteein maʼin naaʼin Jesuu, nachajaa achikit sukuwaʼipa süpüla süküjünüinjatüin alawaa nüchiki Jesuu. Isapejeʼe nachiki tia, nnojotsü nantüin anain wanee kasa noʼutirüinjachikai anainjee Jesuu. Nüsakinnaka Jesuu mapa nutuma Caifás: «¿Shiimainjasaʼa piain chi Nüchonkai Maleiwa?», nümaka nümüin. Nusoutaka Jesuu niʼipajee: «Aa, tayaʼaya». «Nnojoluitpa choʼujaain wayuu wamüin aküjüinjatkat nüchiki. Eʼrüi maʼin nia wayumüin süka müin nünüiki nümüin Maleiwa», nümaka Caifás. Nayasaʼa napüshuaʼa na laülaashii jutkatakana, paaʼinwaasü naaʼin sünain maa: «Anakajaʼa suʼutinnüle aaʼin». Shiʼyaatünaka nuwalapaʼa Jesuu, ejetüna  oʼuutajeechi nia, akoʼoyojoonusü noʼu süka kuluulu sümaa nüsheʼetünüin. «Müleka pialeje chi Cristo Nüneekajalakai Maleiwa, püshantaja saaʼu jaralin asheʼetüin pia», namaka nümüin.

Shiasaʼa jaʼyuupa, outkajaashii nachikuaʼa na laülaashiikana suluʼu tü kanüliakat Sanedrín süpüla nasakirüin Jesuu nachikuaʼa sünain maa: «¿Shiimainsaʼa piain chi Nüchonkai Maleiwa?». Nusoutaka Jesuu neʼipajee: «Aa, shiimain sünain tayain maʼaka tü jüküjakat tamüin». «Aküjüshi alawaa nüchiki Maleiwa. Juʼunira nia nünainmüin Pilato chi Romajeʼewaikai sülaülashikai mma», namaka na laülaashiikana. ¿Kasaka joo alatüin mapa? Wekirajaweerü anain tia sünain tü wane ekirajaayakat.