Sang upod ni Jesus ang mga apostoles sa isa ka kuarto sa ibabaw, nagsiling sia sa ila: ‘Tanan kamo magabiya sa akon sini nga gab-i.’ Si Pedro nagsiling: ‘Indi ina matabo sa akon! Bisan pa magbiya ang tanan sa imo, indi ko gid ikaw pagbiyaan.’ Pero si Jesus nagsiling kay Pedro: ‘Antes makapamalo ang manok, ihambal mo sing tatlo ka beses nga wala ka makakilala sa akon.’

Sang gindala sang mga soldado si Jesus sa balay ni Caifas, nagpalagyo ang kalabanan nga apostoles. Pero ang duha sa ila nagsunod sa mga tawo. Isa sa ila amo si Pedro. Nagkadto sia sa balay ni Caifas kag nagpainit-init sa kalayo sa gua sini. Bangod masanag, nakita sang ulipon nga babayi ang hitsura ni Pedro kag nagsiling: ‘Kilala ko ikaw! Kaupod ka ni Jesus!’

Si Pedro nagsabat: ‘Indi, wala ako kabalo sang imo ginasiling.’ Naglakat sia pakadto sa geyt. Pero nakita sia sang isa pa ka ulipon nga babayi kag nagsiling ini sa mga tawo: ‘Ini nga tawo kaupod ni Jesus!’ Si Pedro nagsiling: ‘Indi ko kilala si Jesus!’ Ang isa ka tawo nagsiling: ‘Kaupod ka gid nila! Ang tono sang imo panghambal taga-Galilea, pareho kay Jesus.’ Pero si Pedro nagsiling: ‘Wala ako makakilala sa iya!’

Dayon namalo ang manok. Nakita ni Pedro nga nagbalikid si Jesus kag nagtulok sa iya. Nadumduman niya ang ginsiling ni Jesus, gani naggua sia kag naghilibion gid.

Sadto nga tion, nagsugtanay ang Sanhedrin nga bistahon si Jesus sa sulod sang balay ni Caifas. Nakadesisyon na sila nga patyon si Jesus, kag nagapangita na lang sila sing rason. Pero wala sila sing makita nga sala sa iya. Sang ulihi, direkta nga ginpamangkot ni Caifas si Jesus: ‘Ikaw bala ang Anak sang Dios?’ Si Jesus nagsabat: ‘Huo.’ Si Caifas nagsiling: ‘Indi na naton kinahanglan ang pamatuod. Pagpasipala ini!’ Gani nagdesisyon ang korte: ‘Ini nga tawo dapat mapatay.’ Gintampa nila si Jesus, ginduplaan, gintabunan ang iya  mga mata, kag ginsumbag, nga nagasiling: ‘Kon manalagna ka, sugiri kami kon sin-o ang nagsakit sa imo!’

Pagkaaga, gindala nila si Jesus sa ginatipunan sang Sanhedrin kag ginpamangkot liwat: ‘Ikaw bala ang Anak sang Dios?’ Si Jesus nagsabat: “Kamo mismo ang nagsiling sina.” Dayon gin-akusahan nila sia sing pagpasipala kag gindala sa palasyo ni Poncio Pilato, ang Romano nga gobernador. Ano dayon ang natabo? Tan-awon naton.