Hmo ntawd thaum Yexus tseem nrog nws cov tubtxib Ua Kevcai Hla Dhau nyob hauv chav tsev sab saud, nws hais rau lawv tias: ‘Hmo no nej txhua tus yuav tso kuv tseg.’ Petus teb tias: ‘Kuv yuav tsis ua li ntawd! Txawm yog lawv sawvdaws tso koj tseg los kuv yeej yuav tsis tso koj tseg li.’ Tiamsis Yexus hais rau Petus tias: ‘Hmo no thaum qaib tsis tau qua, koj yuav tsis lees paub kuv 3 zaug.’

Thaum cov tub rog coj Yexus mus ntawm Khayafa tsev, Yexus cov tubtxib feem coob twb khiav tag lawm. Tiamsis muaj 2 tug tubtxib raws pab neeg coob coob ntawd qab mus. Ib tug yog Petus. Petus txawm mus rau hauv lub tshav puam ntawm Khayafa tsev thiab mus nte taws ntawd. Muaj ib tug nkauj qhev pom Petus ces txawm hais tias: ‘Kuv paub koj! Koj twb nrog Yexus ua ke!’

Petus teb tias: ‘Tsis yog kuv! Kuv tsis paub xyov koj hais dabtsi!’ Petus txawm sawv mus rau ntawm rooj vag. Tiamsis muaj dua ib tug nkauj qhev pom nws ces txawm hais rau sawvdaws tias: ‘Tus txivneej no twb nrog Yexus ua ke thiab!’ Petus teb tias: ‘Kuv tsis paub Yexus!’ Txawm muaj ib tug txivneej hais tias: ‘Koj yeej yog ib tug uas nrog nws ua ke! Koj hais lus zoo li cov neeg Kalilais, zoo li Yexus.’ Tiamsis Petus twv tias: ‘Kuv yeej tsis paub nws kiag li!’

Tamsim ntawd, qaib txawm qua. Petus pom Yexus tig los saib nws. Petus nco dheev txog Yexus cov lus, nws thiaj tawm mus sab nraud thiab quaj tu siab heev.

Lub sijhawm ntawd, pab Xaheree tseem hais Yexus rooj plaub hauv Khayafa tsev. Lawv twb npaj siab muab Yexus tua tiamsis lawv xav nrhiav ib yam los kom nws tso. Lawv nrhiav tsis tau pov thawj los ntxo nws li. Thaum kawg, Khayafa thiaj nug Yexus tim ntsej tim muag tias: ‘Koj yog Vajtswv tus Tub lov?’ Yexus teb tias: ‘Kuv yog.’ Khayafa thiaj hais tias: ‘Peb tsis tas muaj pov thawj ntxiv lawm. Nws hais lus tuam mom Vajtswv!’ Lub rooj sablaj thiaj pom zoo tias: ‘Yuav tsum muab tus  txivneej no tua.’ Lawv muab Yexus nplawm thiab nto qaub ncaug rau nws. Lawv muab ntaub los npog nws qhov muag thiab ntaus nws. Lawv hais tias: ‘Koj twb yog ib tug cev Vajtswv lus, cia li qhia rau peb seb leejtwg ntaus koj!’

Thaum kaj ntug, lawv coj Yexus mus rau hauv lub tsev Xaheree thiab nug nws dua tias: ‘Koj yog Vajtswv tus Tub lov?’ Yexus teb tias: ‘Nej hais tias kuv yog.’ Lawv teem txim tias Yexus hais lus tuam mom Vajtswv. Lawv thiaj coj Yexus mus cuag Phauthi-au Philaj uas yog cov Loos tus tswv xeev. Tau muaj li cas ntxiv? Cia peb kawm mus.