Yesu gaw kasa ni hte arau ntsa htap na gawk kaw nga nga ai shaloi, shi ndai hku tsun ai: ‘Dai na nanhte yawng ngai hpe kau da na re.’ Petru ndai hku tsun ai: ‘Ngai gaw n re. Kaga ni nang hpe kau da yang pyi, ngai gaw nang hpe galoi kau da na n re.’ Raitim, Petru hpe Yesu ndai hku tsun ai: ‘U n goi shi yang, ngai hpe n chye ai ngu nang masum lang tsun na re.’

Hpyen la ni gaw Yesu hpe Kayapa a nta de woi sa mat ai. Kasa law malawng gaw hprawng mat ma sai. Raitim, shanhte kaw nna lahkawng gaw shawa hpawng hpang kaw nna hkan nang wa ai. Dai kaw na langai gaw Petru re. Shi gaw Kayapa a nta wang de sa nna, wan kra taw ai. Wan a nhtoi a majaw, mayam num langai gaw Petru hpe matsing mat nna: ‘Ngai nang hpe chye ai. Nang mung Yesu hte arau re’ ngu tsun ai.

Petru gaw: ‘N re. Ngai n re. Nang hpa tsun taw ai hpe ngai n chye ai’ ngu nna tsun ai. Wang chyinghka de Petru sa mat ai. Raitim, kaga mayam num langai mung Petru hpe mu nna, shawa hpawng hpe ndai hku tsun dat ai: ‘Ndai wa mung Yesu hte arau rai nga ai.’ Petru gaw: ‘Yesu ngu ai wa gaw kadai re ai hpe pyi ngai n chye ai’ ngu tsun ai. La langai gaw ndai hku bai tsun ai: ‘Nang gaw shanhte kaw nna langai re. Na a ga shaga ai nsen hpe madat yu yang, nang mung Yesu zawn Galile masha langai re ai hpe anhte lu tsun ai.’ Raitim, Petru gaw dagam nna ndai hku tsun ai: ‘Ngai shi hpe n chye ai.’

Dai aten hta, u goi mat ai. Shaloi, Yesu shi hpe kayin yu dat ai hpe Petru mu dat yang, Yesu tsun wa ai ga hpe dum mat ai. Dai majaw, shinggan de pru nna, grai yawn let hkrap nga ai.

Dai aten hta sha, Yuda tara rung re ai Sanhedrin kaw nna salang ni gaw, Kayapa a nta kata hta Yesu hpe san jep ma ai. Yesu hpe sat na matu shanhte dawdan da ngut sai. Dai majaw, sat lu na lam mara tam nga ai. Raitim, shi hpe sat na matu mara hpa mung tam n mu ma ai. Hpang jahtum, Kayapa gaw Yesu hpe ndai hku dingtawk san dat ai: ‘Nang gaw Karai Kasang a Kasha rai kun?’ Yesu gaw: ‘Re’ nga nna htai ai. Shaloi, Kayapa gaw ndai hku tsun ai: ‘Anhte gara sakse naw ra a ta? Dai gaw, Karai Kasang hpe jahpoi asawng ai lam re.’ Tara rung mung myit hkrum nna: ‘Shi gaw si ging ai wa re’ ngu nna tsun ai.  Shanhte gaw Yesu hpe shabyi bye ai, mayam mahtaw bun ai, myi hpe magap nna kayat ai. Ngut nna, ‘nang myihtoi rai yang, nang hpe kadai kayat ai hpe tsun u’ nga nna mung tsun ai.

Nhtoi htoi yang, Yesu hpe Sanhedrin gawknu de woi sa mat nna, dai kaw ndai hku bai san ai: ‘Nang gaw Karai Kasang a Kasha rai kun?’ Yesu ndai hku mahtai jaw ai: ‘Nanhte tsun ai hte maren ngai rai nga ai.’ Karai Kasang hpe jahpoi asawng ai mara nga ai ngu Yesu hpe shanhte mara tam nna, Roma Munggyi Puntu Pilat a htingnu de shaga sa mat ai. Dai hpang hpa bai byin ai kun? Yu yu ga.