Kantu Jizus staba ku se apóstlus na sala ki ta fikaba na primeru andar, el fla-s: ‘Es noti, tudu nhos ta ben bandona-m.’ Pedru fla: ‘Ami nau! Sikrê tudu es dexa-u, ami N ka ta dexa-u.’ Má Jizus fla Pedru: ‘Antis di un galu kanta, bu ta fla três bês ma bu ka konxe-m.’

Kantu trópas leba Jizus pa kaza di Kaifás, apóstlus dja fujiba. Má dôs di kes apóstlu sigi kel grupu di algen. Un di es éra Pedru. El entra na kintal di kaza di Kaifás i el bai fika pértu di fogera ki staba la, pamodi friu. Na lus, un npregada odja róstu di Pedru i el fla: ‘N konxe-u! Bu ta staba ku Jizus!’

Pedru fla: ‘Nau, mi N ka ta staba ku el! N ka sabe di kuzê ki bu sta pâpia!’ Pedru sai di la i el bai pa porton. Má dipôs otu npregada odja-l i fla kes algen ki staba la: ‘Kel ómi li ta staba ku Jizus!’ Pedru fla: ‘Ami N ka sabe kenha ki é Jizus!’ Un ómi fla: ‘Bo é un di es! N ta fla-u si pamodi bu ta pâpia sima gentis di Galilea i sima Jizus tanbê.’ Má Pedru jura: ‘Mi N ka konxe-l!’

Kel óra, un galu kanta. Pedru odja Jizus ta vira pa djobe-l. El lenbra di kuza ki Jizus dja flaba i el sai di la ta txora ku txeu mágua.

Nton, Tribunal ki txomaba Sinédriu, disidi julga Jizus déntu kaza di Kaifás. Dja es disidiba mata Jizus i gósi es staba ta djobe un motivu pa faze kel-la. Má es ka konsigi atxa nada kóntra el. Ti ki Kaifás pergunta Jizus: ‘Bo é Fidju di Deus?’ Jizus fla: ‘Sin, mi é.’ Kaifás fla: ‘Nu ka meste más próva. Kel-li é falta di ruspetu pa Deus!’ Tribunal txiga un akordu: ‘Kel ómi li  merese móre.’ Es da Jizus bafatada, es kuspi-l, es tapa-l odju, es sota-l i es fla-l: ‘Si bo é un proféta, fla ken ki sota-u!’

Kantu manxe, es leba Jizus pa Tribunal más altu di judeus. Es torna pergunta-l: ‘Bo é Fidju di Deus?’ Jizus responde: ‘Nhos mê ki fla ma mi é.’ Nton es kulpa-l di disruspeta Deus i es leba-l pa palásiu di Pónsiu Pilátus ki éra governanti di Roma. Kuzê ki kontise dipôs? Nu ben odja na kel otu stória.