Rĩrĩa Jesu aarĩ na atũmwo ake ngoroba-inĩ, aamerire ũũ: ‘Inyuothe nĩ mũkũndiganĩria ũtukũ wa ũmũthĩ.’ No Petero akĩmwĩra: ‘Niĩ ndingĩgũtiga! O na arĩa angĩ othe mangĩgũtiga, niĩ ndirĩ hingo ngagũtiga.’ Nake Jesu akĩmwĩra ũũ: ‘Mbere ya ngũkũ ĩkũgĩte, ũgũkorũo ũngaanĩte maita matatũ.’

Rĩrĩa thigari ciatwarire Jesu gwa Kaiafa, hakuhĩ atũmwo othe nĩ moorire. No erĩ ao nĩ maamumire thutha marĩ gatagatĩ-inĩ ga kĩrĩndĩ. Ũmwe wao aarĩ Petero. Nĩ aathiire nja gwa Kaiafa na akĩambĩrĩria guota mwaki. Mũirĩtu ũmwe warĩ ndungata nĩ aamuonire handũ haarĩ na ũtheri na akĩmwĩra ũũ: ‘Wee nĩ ndĩrakũmenya! Muuma na Jesu!’

Petero oigire ũũ: ‘Aca, niĩ tũtiuma nake! O na ndiũĩ ũraria ũhoro wa kĩĩ!’ Aacokire agĩthiĩ erekeire kĩhingo-inĩ. No o hĩndĩ ĩyo mũirĩtu ũngĩ warĩ ndungata nĩ aamuonire na akĩra kĩrĩndĩ ũũ: ‘Mũndũ ũyũ moima na Jesu!’ Petero oigire ũũ: ‘Niĩ o na ndiũĩ Jesu!’ Nake mũthuri ũmwe akiuga ũũ: ‘Ũrĩ ũmwe wao! Mwarĩrie waku nĩ ũroiga atĩ umĩte Galili o ta Jesu.’ No Petero akĩhĩta ũũ: ‘Niĩ ndimũũĩ!’

Ngũkũ nĩ yakũgire o hĩndĩ ĩyo, na Petero akĩona Jesu ehũgũra na amũrora. Nĩ aaririkanire ciugo cia Jesu na akiuma nja akĩrĩra arĩ na ruo rũnene.

Ihinda-inĩ rĩu, Sanhedrini nĩ yatuire gũcirithĩria Jesu gwa Kaiafa mũciĩ. Nĩ maatuĩte itua rĩa kũũraga Jesu no rĩu meendaga kũmũcarĩria mahĩtia nĩguo mamũũrage. No gũtirĩ ihĩtia monaga. Thutha ũcio Kaiafa nĩ oririe Jesu ũũ: ‘Wee nĩwe Mũrũ wa Ngai?’ Nake Jesu akĩmwĩra ũũ: ‘Ĩ nĩ niĩ.’ Kaiafa oigire ũũ: ‘Tũtirabatara ũira ũngĩ. Nĩ aruma Ngai!’ Thutha ũcio igooti nĩ rĩetĩkanĩirie ũndũ ũyũ: ‘Mũndũ ũyũ aagĩrĩirũo nĩ gũkua.’ Maahũrire Jesu hĩ, makĩmũtuĩra mata, makĩmũhumbĩra  maitho, na makĩmũringa makiugaga ũũ: ‘Angĩkorũo ũrĩ mũnabii, twĩre nũ wakũringa!’

Rĩrĩa gwakĩire, maatwarire Jesu mbere ya Sanhedrini na makĩmũũria rĩngĩ: ‘Wee nĩwe Mũrũ wa Ngai?’ Jesu akĩmacokeria ũũ: ‘Inyuĩ nĩ inyuĩ mũroiga atĩ nĩ niĩ we.’ Moigire atĩ nĩ aaruma Ngai na makĩmũtwara nyũmba-inĩ ya Pontio Pilato ũrĩa warĩ Ngavana wa Roma. Nĩ ũndũ ũrĩkũ wacokire gwĩkĩka? Rekei tuone.