LUFUNJISHO 89
Petelo Wakana Yesu
Yesu byo ajinga na baana banji ba bwanga mu kibamba kya peulu, wibambijile’mba: ‘Lelo bufuku anweba bonse musakunyema ne kunsha bunke.’ Petelo wakaine’mba: ‘Amiwa ne. Nangwa kya kuba bonse basakwimusha, amiwa kechi nsakwimusha ne.’ Yesu waambijile Petelo amba: ‘Shikombwe saka akyangye kukokola, usakunkana jisatu amba kechi wangyuka ne.’
Bashilikale byo batwajile Yesu ku nzubo ya kwa Kaifasa, bavula banyemene. Petelo ne mukwabo, bo bonkatu bamulondejilenga. Petelo wakatwelele ne mu kipango kya kwa Kaifasa waya ne nakota mujilo. Na mambo a kyeya kya mujilo, nsongwakazhi wa mwingilo wamuyukile ne kumwambila’mba: ‘Nemuyuka, ne anweba mwajinga ne Yesu.’
Petelo wakaine’mba: “Amiwa kechi nayuka kyo ubena kwambapo ne.” Waya wakemana ne kwipi na kibelo. Kabiji nsongwakazhi mukwabo wamumwene ne kubuula bantu amba: ‘Ne babo nabo bajinga ne Yesu.’ Petelo wakaine’mba: ‘Amiwa kechi namuyuka awo muntu ne!’ Mwanamulume umo naye waambile’mba: ‘Ukana ka, ne obewa wajinga nanji.’
Ponkapo shikombwe wakokwele. Petelo byo amwene Yesu waaluluka ne kumutala, wavulukile byaambile Yesu. Ponkapo walupukile pangye ne kujila bingi.
Ba mu kije kya Saniedilini bakonkene pamo mu nzubo ya kwa Kaifasa kuba’mba batotolweshe Yesu. Bafuukwile kuba’mba bepaye Yesu, bino bakebelenga byambo bya bubela bya kumushiina, bino kechi bebitaine ne. Kepo Kaifasa aipwizhe Yesu amba: ‘Nanchi yobe mwana Lesa nyi?’ Yesu wakumbwile’mba: ‘Yami iye.’ Kaifasa waambile’mba: ‘Kechi twafwainwa kukeba bishiino bikwabo ne. Uno muntu wauba mwenga Lesa!’ Kije kyonse kyaswile ne kwamba’mba: ‘Uno muntu wafwainwa kufwa.’ Kepo bamuzhangawilemo mapi Yesu, kumushipila mate, bamuvweta kisapi pa meso akwe saka babena kumupuma binkonyi. Bamwambijilenga’mba: ‘Inge wingauzhi, tubuule, ñanyi wakupuma!’
Byo bwakile, Yesu bamutwajile ku kije kya Saniedilini ne kumwipuzha jikwabo amba: ‘Nanchi yobe Mwana Lesa nyi?’ Yesu wakumbwile’mba: ‘Anweba bene mwaamba’mba yami iye.’ Kepo bamupelemo mambo a kuba mwenga Lesa. Bamutwajile kwi Pontiusa Pilato, ndamakyalo wa bena Loma. Ñanyi kintu kyalondejilepo? Twaya tumone.
“Kimye kibena kwiya, kabiji kyafika, kyo bakemupalañanya awu kwanji awu kwanji, kabiji mukanshatu bunke; bino kechi nji bunke ne, mambo Batata baji ne amiwa.”—Yoano 16:32
Mwakonsha Kutemwa
YESU?—YE JISHINDA, BUKINE, NE BUMI
Yesu Bamutwajile kwi Anasa, Kabiji Bakamufikizhe kwi Kaifasa
Jishinda jo bachibijilemo mambo a kwa Yesu kechi jayijilemo na mizhilo ne.
YESU?—YE JISHINDA, BUKINE, NE BUMI
Bamukainjile mu Nzubo ya kwa Kaifasa
Ki ka kyalengejile Petelo kukana Yesu saka ajinga muntu wakosa kabiji wa kishinka?
YESU?—YE JISHINDA, BUKINE, NE BUMI
Bamutwajile ku Saniedilini, Kepo Bamufikizhe kwi Pilato
Bantangi ba bupopweshi bwa Bayudea basolwele byajinga mu milanguluko yabo.
