We Jizɔs bin de wit in apɔsul dɛn ɔp wan rum, i tɛl dɛn se: ‘Una ɔl go lɛf mi dis nɛt.’ Pita tɔk se: ‘Nɔto mi! Ivin if ɔl di ɔda wan dɛn lɛf yu, mi nɔ go ɛva lɛf yu.’ Bɔt Jizɔs tɛl Pita se: ‘Bifo fɔl kro, yu go tɔk tri tɛm se yu nɔ no mi.’

We di sojaman dɛn kɛr Jizɔs go na Keyafas in os, bɔku pan in apɔsul dɛn rɔnawe. Bɔt tu pan dɛn fala di krawd. Wan pan dɛn na Pita. I go na Keyafas in kɔmpawnd ɛn sidɔm nia di faya fɔ wam insɛf. We Pita bin kam usay layt de, wan savant gal si in fes ɛn tɔk se: ‘A sabi yu! Yu bin de wit Jizɔs!’

Pita tɔk se: ‘Nɔ, a nɔ bin de wit am! A nɔ no wetin yu de tɔk bɔt!’ I bigin waka go na di get. Bɔt i nɔ tu te, wan ɔda savant gal si am ɛn tɛl di krawd se: ‘Dis man bin de wit Jizɔs!’ Pita tɔk se: ‘A nɔ ivin sabi Jizɔs!’ Wan man tɔk se: ‘Yu na wan pan dɛn! We a yɛri di we aw yu de tɔk, a no se yu kɔmɔt na Galili jɔs lɛk Jizɔs.’ Bɔt Pita swɛ se: ‘A nɔ sabi am!’

Da sem tɛm de, wan fɔl kro. Pita bin si we Jizɔs tɔn fɔ luk am. I mɛmba di wɔd dɛn we Jizɔs bin tɔk, ɛn i go na do ɛn kray bita bita wan.

Insay da sem tɛm de, di Sanɛndrin bin kam togɛda fɔ tɛst Jizɔs insay Keyafas in os. Dɛn bin ɔlrɛdi dɔn disayd fɔ kil Jizɔs, so naw dɛn bin de fɛn rizin fɔ du dat. Bɔt dɛn nɔ ebul fɔ fɛn ɛni bad agens am. Faynali, Keyafas bin aks Jizɔs dayrɛkt wan se: ‘Yu na Gɔd in Pikin?’ Jizɔs tɛl am se: ‘Yɛs, na mi.’ Keyafas tɔk se: ‘Wi nɔ nid ɔda pruv igen. I de tɔk bad agens Gɔd!’ Di kɔt bin gri se: ‘Dis man nid fɔ day.’ Dɛn slap Jizɔs, pit pan am, kɔba in yay, nak am, ɛn tɔk se: ‘If yu na prɔfɛt, tɛl wi udat nak yu!’

 We doklin, dɛn kɛr Jizɔs go na di Sanɛndrin ɛn aks am bak se: ‘Yu na Gɔd in Pikin?’ Jizɔs ansa se: ‘Una de tɔk se na mi.’ Dɔn dɛn bin tɔk se i gilti fɔ tɔk bad agens Gɔd, ɛn dɛn kɛr am go to Pɔntiɔs Paylet we na bin di Roman gɔvnɔ. Wetin bin apin afta dat? Mek wi si.