တၢ်မၤလိ ၈၉
စီၤပ့းတရူးသမၢယ့ၣ်ၡူး
ဖဲယ့ၣ်ၡူးအိၣ်ဒီးအတၢ်မၢဖိတဖၣ်လၢ ဒၢးတဖျၢၣ်လၢဟံၣ်ဖီခိၣ်အခါ ယ့ၣ်ၡူးတဲဘၣ်အဝဲသ့ၣ်လၢ– ‘တနၤအံၤ သုကပာ်တ့ၢ်ယၤကိးဂၤဒဲးလီၤ.’ စီၤပ့းတရူးတဲဆၢအီၤလၢ– ‘ယတမၤဘၣ်. ပှၤကိးဂၤဒဲး မ့ၢ်ပာ်တ့ၢ်နၤ သနာ်က့ ယတပာ်တ့ၢ်နၤဘၣ်.’ ဘၣ်ဆၣ် ယ့ၣ်ၡူးတဲဘၣ်စီၤပ့းတရူးလၢ– ‘တချုးလၢဆီဖါအိၣ်အိဒံးဘၣ်န့ၣ် နကတဲလၢနတသ့ၣ်ညါယၤဘၣ် သၢဘျီလီၤ.’
ဖဲပှၤသုးဖိတဖၣ်ဆှၢယ့ၣ်ၡူးလၢ စီၤကၤယါဖၤအဟံၣ်အခါ ယ့ၣ်ၡူးအတၢ်မၢဖိအါတက့ၢ်န့ၣ် ဃ့ၢ်ပူၤဖျဲးအသးလီၤ. ဘၣ်ဆၣ် ယ့ၣ်ၡူးအတၢ်မၢဖိခံဂၤ လဲၤပိာ်ဝဲပှၤဂီၢ်မုၢ်အခံလီၤ. တဂၤန့ၣ် မ့ၢ်ဝဲ စီၤပ့းတရူးလီၤ. စီၤပ့းတရူးလဲၤဝဲလၢ စီၤကၤယါဖၤအဟံၣ်တၢ်ပျီပူၤ ဒီးဆူးဝဲမ့ၣ်အူလီၤ. လၢမ့ၣ်အူ အတၢ်ကပီၤအဃိ ပိာ်မုၣ်တဂၤထံၣ်ဝဲစီၤပ့းတရူးအမဲာ်သၣ် ဒီးတဲဝဲလၢ– ‘ယသ့ၣ်ညါနၤ. နမ့ၢ်ပှၤလၢအိၣ်ဒီးယ့ၣ်ၡူးလီၤ.’
စီၤပ့းတရူးတဲဝဲလၢ– ‘တမ့ၢ်ယၤဘၣ်. နတဲတၢ်မနုၤလဲၣ်န့ၣ် ယတသ့ၣ်ညါဘၣ်.’ ဒီးစီၤပ့းတရူးလဲၤဝဲဆူ ဟံၣ်ကရၢၢ်အကျဲစၢၤလီၤ. တယံာ်ဘၣ်န့ၣ် ပိာ်မုၣ်အဂၤတဂၤထံၣ်အီၤဒီး တဲဘၣ်ပှၤဂီၢ်မုၢ်လၢ– ‘ပိာ်ခွါတဂၤအံၤ အိၣ်ဒီးယ့ၣ်ၡူးလီၤ.’ ဘၣ်ဆၣ် စီၤပ့းတရူးတဲဝဲလၢ– ‘ယတသ့ၣ်ညါယ့ၣ်ၡူးဘၣ်.’ ဝံၤဒီး ပိာ်ခွါတဂၤတဲဝဲလၢ– ‘နဘၣ်ဃးဒီးအဝဲသ့ၣ်လီၤ. နကလုၢ်လီၤဂာ် ပှၤကၤလံၤလါဖိယ့ၣ်ၡူးလီၤ.’ စီၤပ့းတရူးတဲဝဲလၢ– ‘ယတသ့ၣ်ညါအီၤဘၣ်.’
ဖဲန့ၣ်အဆၢကတီၢ် ဆီဖါအိၣ်အိထီၣ်ဝဲလီၤ. စီၤပ့းတရူးထံၣ်ဝဲယ့ၣ်ၡူးဃၣ်ဃီၤအသး ဒီးကွၢ်တၢ်ဆူအအိၣ်လီၤ. စီၤပ့းတရူးသ့ၣ်နီၣ်ထီၣ်က့ၤ ယ့ၣ်ၡူးအတၢ်ကတိၤ ဒီးဟးထီၣ်ဝဲဆူတၢ်ချၢဒီး ဟီၣ်ဝဲလီၤ.
ပှၤယူဒၤအစံၣ်ညီၣ်ကွီၢ်တဖၣ် ဟ့ၣ်ကူၣ်ဝဲလၢကဆှၢထီၣ်ဝဲ ယ့ၣ်ၡူးဆူစီၤကၤယါဖၤအဟံၣ်လီၤ. အဝဲသ့ၣ်ကမၤသံယ့ၣ်ၡူးန့ၣ် ဆၢတဲာ်ပာ်ဝဲဝံၤလံ. ခဲအံၤ အဝဲသ့ၣ်ဃုတၢ်ဂ့ၢ်လၢ ကမၤသံယ့ၣ်ၡူးအဂီၢ်လီၤ. ဘၣ်ဆၣ် အဝဲသ့ၣ်ဃုဝဲယ့ၣ်ၡူး အတၢ်ကမၣ်တဘၣ်နီတမံၤဘၣ်. လၢခံန့ၣ် စီၤကၤယါဖၤ သံကွၢ်ဝဲယ့ၣ်ၡူးလိၤလိၤလၢ– ‘နမ့ၢ်ကစၢ်ယွၤအဖိခွါဧါ.’ ဒီးယ့ၣ်ၡူးတဲဆၢက့ၤဝဲလၢ– ‘ယမ့ၢ်ယွၤအဖိခွါလီၤ.’ စီၤကၤယါဖၤတဲဝဲလၢ– ‘ပတလိၣ်ဘၣ် တၢ်အုၣ်အသးလၢအဂၤလၢၤဘၣ်. အဝဲကတိၤကမၣ်ယွၤလံ.’ ပှၤစံၣ်ညီၣ်ကွီၢ်တဖၣ်တဲဝဲလၢ– ‘ပှၤတဂၤအံၤကြၢးသံဝဲလီၤ.’ အဝဲသ့ၣ်ဒဲယ့ၣ်ၡူးအမဲာ်, ထူးပှဲာ်ဒိးအီၤ, ကးဘၢအမဲာ်ဒီးထိအီၤလီၤ. အဝဲသ့ၣ်တဲဝဲလၢ– ‘မ့ၢ်မတၤတဂၤထိနၤလဲၣ်, နမ့မ့ၢ်ဝံတဂၤန့ၣ် တဲဘၣ်ပှၤသၢၣ်.’
ဖဲမုၢ်ဝါထီၣ်အခါ အဝဲသ့ၣ်လဲၤကိးယ့ၣ်ၡူးဆူ ပှၤယူဒၤဖိအပှၤစံၣ်ညီၣ်ကွီၢ် လၢအဒိၣ်ကတၢၢ်အဒၢးပူၤလီၤ. ဒီးအဝဲသ့ၣ်သံကွၢ်ကဒီးယ့ၣ်ၡူးလၢ– ‘နမ့ၢ်ယွၤအဖိခွါဧါ.’ ယ့ၣ်ၡူးတဲဆၢဝဲလၢ– ‘သုတဲဝဲလၢ ယမ့ၢ်ယွၤအဖိခွါလီၤ.’ ဝံၤဒီး အဝဲသ့ၣ်တဲဝဲလၢ ယ့ၣ်ၡူးမ့ၢ်ပှၤလၢကတိၤကမၣ်ယွၤလီၤ. လၢတၢ်န့ၣ်အဃိ အဝဲသ့ၣ်ဆှၢထီၣ်ယ့ၣ်ၡူးဆူ ရိမ့ၤအပဒိၣ်ဖးဒိၣ် ပီၣ်တံၤပံၤလးအနီပူၤလီၤ. လၢခံတၢ်ကမၤအသးဒီးယ့ၣ်ၡူးဒ်လဲၣ်, ပကကွၢ်သကိးလၢ တၢ်မၤလိလၢခံတခါလီၤ.
“တၢ်အဆၢအကတီၢ်ကဘၣ် . . . လၢသုကလီၤပြံလီၤပြါ, တဂၤဆူအလီၢ်ဒၣ်ဝဲ, တဂၤဆူအလီၢ်ဒၣ်ဝဲ, ဒီးသုကလဲၤသဒၣ်ယၤ, ဒီးသုကပာ်လီၤတဲာ်ယၤတဂၤဃီလီၤ. ဘၣ်ဆၣ်ဒီးယတအိၣ်ဘၣ်တဂၤဃီဘၣ်. အဂ့ၢ်ဒ်အံၤ, ပၢ်အိၣ်ဒီးယၤလီၤ.”—ယိၤဟၣ် ၁၆:၃၂