Yesu hadiñayi nawapostolu indi mukapeka kahewulu, wayilejeli nindi: ‘Wejima wenu mukunshiya nawufuku.’ Petulu wahosheli nindi: ‘Ami nehi! Hela neyi ejima akukushiya, ami nukukushiya wanyi.’ Ilaña Yesu wamulejeli Petulu nindi: ‘Henohu ikombu kanda eteli, wukuhosha kasatu neyi wañiluka wanyi.’

Amashidika chamutwaliliwu Yesu kwitala daKayafwasi, apostolu amavulu atemukili. Ilaña ayedi alondeleleña mwizaza. Wumu hakachi kawu wadiña Petulu. Wayili mulubanza lwetala daKayafwasi nawa watachikili kwota kesi. Chineli kwadiña chejeji, ñamba wamumbanda wakansi wamumweni Petulu nakumwila nindi: ‘Nakwiluki! Wadiña hamu naYesu!’

Petulu wahosheli nindi: ‘Inehi, nadiña hamu nindi wanyi! Nsañu yiwunakuhosha nayiluki wanyi!’ Petulu wanyamukili nakuya kuchiisu. Ilaña haleheli wanyi, ñamba wamumbanda mukwawu wakansi wamumweni nawa walejeli izaza dawantu nindi: ‘Iwu iyala wadiña hamu naYesu!’ Yena wahosheli nindi: ‘Ami kwami ninowu Yesu namwiluka wanyi!’ Iyala wumu wamulejeli nindi: ‘Nineyi wudi hakachi kawu! Idimi deyi dinakutiyakana nawu wudi wakuÑaliliya neyi Yesu.’ Ilaña Petulu wasanyikili nindi: ‘Namwiluka wanyi!’

Hayoyina mpinji, ikombu wakookweli. Petulu wamweni Yesu nabalumuki nakumutala. Wanukili mazu ahosheliyi Yesu, wayili hanji nawa wadilili nankashi.

Hayoyeniyi mpinji, akaSanihedirini apompeli hamu kulonda amusompesheli Yesu mwitala daKayafwasi. Adiña afuukula dehi nawu amujahi Yesu, nawa haniyi mpinji akeñeleña hakumwinkela muloña. Ilaña hiyawaninihu hakumwinkela muloñaku. Nkumininaku, Kayafwasi wamwihwili Yesu nindi: ‘Yeyi Mwana kaNzambi?’ Yesu waakwili nindi: ‘Yami.’ Kayafwasi wahosheli nindi: ‘Hitunakukeña cheñi wunsahu wukwawuku. Aka hikasawuntu!’ Chota chetejeli nawu: ‘Iwu iyala  watelela kufwa.’ Amweteli Yesu jimbañala, amufwijilili mazeñi, amubutili hamesu nikumweta, nakuhosha nawu: ‘Neyi wudi kaprofwetu, tuleji wunakweti!’

Chikwachili, amutwalili Yesu kuchota chaSanihedirini nawa amwihwili cheñi nawu: ‘Yeyi Mwana kaNzambi?’ Yesu wayakwili nindi: ‘Munahoshi nenu yami.’ Kuhiñahu amwinkeli muloña wakuhosha kasawuntu nawa amusendeli nakumutwala kuchipañu chaPontusi Pilatu, Nguvulu waRoma. Chumanyi chahiñilihu? Tuyenu tutali.