Lino Yesu wali umu muputule wapapela na atumwa yakwe wayaneenyile ati: ‘Usiku kwene uu, mwensi mumansya.’ Petulo watiile: ‘Nemo foo! Nanti yaa yonsi yangakusya, nemo ntalatala nkusye.’ Lelo Yesu waneenyile Petulo ati: ‘Lino mukolwe atatala walila, wemo umankaana imiku itatu ale ukulanda ukuti utaamanyile.’

Lino asilika yasenzile Yesu uku ng’anda yakwe Kayafa, atumwa aingi yutwike. Lelo yaili yalondiile iumba. Wenga pali yayo a Petulo. Waile afika pa musolo wa ng’anda yakwe Kayafa atandika nu koota umoto. Lino Petulo wali kuuku muomvi umukazyana wamuweni nu kulanda ati: ‘Inkumanya! Wali na Yesu!’

Petulo nawe watiile: ‘Awe, asi nene! Ntamanyile vino ukulandapo!’ Lyene wafumilepo aya uku mpongolo. Muomvi muze umukazyana wamuweni nu kuneena antu ati: ‘Muntu wii wali na Yesu!’ Petulo nawe watiile: ‘Yesu kwene wiyo ntamumanyile!’ Umonsi umwi nawe watiile: ‘Wayanga pamwi nayo! Nimilandile yako kwene ikulanga ukuti wafuma uku Galili, wakwe Yesu.’ Lelo Petulo walafile ati: ‘Nemo ntamumanyile!’

Pa nsita kwene iya mukolwe walizile. Lyene Petulo waweni kuno Yesu wapiliuka nu kumulolekesya. Alino wiwisye amazwi yano Yesu wamuneenyile, nupya wafumile apanzi alila sana.

Lino papisile insita inono, aa mu cilye ica Sanihedilini yalanzyanyizye ukuti Yesu akapingwilwe uku ng’anda yakwe Kayafa. Pa nsita ii ala iyapingula mpiti kuti Yesu alinzile ukukomwa, nomba yalondanga umulandu uno wali nu kukomelwapo. Lelo yatamuzanyile nu mulandu uli onsi. Nu mukusyalikizya Kayafa uzizye Yesu umukulungatika ati: ‘Uzye wewe Umwana wakwe Leza?’ Yesu watiile: “anene kwene.” Kayafa nawe walanzile ati: ‘Tusikulondekwa ivisinka na vyuze. Muntu wii waponta.’ Aa mu cilye yazumile iyati: ‘Muntu wii alinzile ukufwa.’ Yumile Yesu mapi,  kumuswila amati, kumuvimba pa manso, nu kumuma alino iyalanda iyati: ‘Ndi cakuti wewe kasesema, tuneene uwatakuma.’

Uwanda uwalondeliilepo, yasenzile Yesu uku cilye ica Sanihedilini nu kumuzya nupya iyati: ‘Uzye wewe Umwana wakwe Leza?’ Yesu waswike ati: ‘Imulanda ati aneene kwene.’ Lyene yamupeezile umulandu uwa kuponta nupya yamutwazile ukwi isano lyakwe Ponti Pilato kateeka Umwina Loma. I vyani ivyalondelilepo? Leka tulole.