Ke Jesus ear pãd ippãn rijjilõk ro an ilo ruum̦ eo ilõñ, ear ba ñan er: ‘Boñõn in, kom̦ aolep naaj ko jãn ña.’ Im Piter eba: ‘Ejjab ña! Jekdo̦o̦n ñe ro jet renaaj ko jãn kwe, ak iban ko.’ Ak Jesus ear ba ñan Piter: ‘M̦okta jãn an ekkũr kako, jilu alen kwõnaaj ba bwe kwõjaje kajjieõ.’

Innem ke rũttarin̦ae ro rar bõk Jesus ñan m̦weo im̦õn Kaiepas, enañin aolep rijjilõk ro rar ko. Bõtab ruo iaaer rar l̦oorl̦o̦k e ippãn kumi in armej ro. Juon iaan rein kar Piter. Ear etal ñan mel̦an in m̦weo im̦õn Kaiepas im kõmmããn̦ãn̦ iturin kijeek eo. Ke kijeek eo ej romel̦o̦k turin mejãn, juon leddik ej kile im ba: ‘Ijel̦ã wõn kwe! Kwe eo kwokõn pãd ippãn Jesus!’

Piter ear ba: ‘Ejjab ña eo! Ijaje ta n̦e kwõj kõnnaan kake!’ Im ear jino an etal ñan kõjãmin wõrwõr eo. Ak kiiõ bar juon leddik ebar loe im ba ñan armej ro: ‘L̦ein ear pãd ippãn Jesus!’ Piter eba: ‘Ak iñak wõn in Jesus!’ Im juon em̦m̦aan ear ba: ‘Kwõj juon iaaer bwe ealikkar ilo wãween am̦ kõnnaan. Kwokõnnaan in RiGalili ãinwõt Jesus.’ Ak Piter ear kajje im ba: ‘Ijaje kajjien armej en̦!’

Ilo ejja iien eo wõt, ear ikkũr kako. Innem Piter ear reilo̦k im lo an Jesus jal̦l̦o̦k im kalimjeke. Kiiõ ej keememejtok naan ko an Jesus, innem ear diwõj nabõjl̦o̦k im lukkuun jañ.

Ak kiiõ ro uwaan jikin ekajet eo an RiJu ro rar kweilo̦k ippãn doon bwe ren ekajete Jesus ilowaan m̦weo im̦õn Kaiepas. Em̦õj aer pepe kadede bwe ren m̦ane, im kiiõ rej kappok ruõn bwe ren liaakel̦o̦k. Ak rar jab maroñ lo ruõn. Ãliktata, Kaiepas ear kajju kajjitõk ippãn Jesus: ‘Kwe ke Nejin Anij?’ Jesus eba: ‘Aet.’ Im Kaiepas ear ba: ‘Jejjab bar aikuj kein kam̦ool. Ej bũl̦aajpiim!’ Riekajet ro rar errã im ba: ‘Armej in ej aikuj mej.’ Rar jeptake Jesus, kapilouki, pineje mejãn, im deñõte  im ba: ‘El̦aññe kwe juon rũkanaan, kwõn ba ñan kõm wõn eo ear deñõt eok!’

Ke ej raantak, rar bõk Jesus ñan jikin ekajet eo an RiJu ro im bar kajitũkini: ‘Kwe ke Nejin Anij?’ Jesus euwaak: ‘Kom̦ij ba wõt!’ Kõn men in, rar n̦aruon im ba bwe ej bũl̦aajpiim im rar bõke ñan m̦weo im̦õn Pontiõs Pail̦at, kabna eo an Rom. Kiiõ ta eo ear wal̦o̦k tokãlik? Jen lale.