Ba zilalö me fao Yesu khö ndra sinengenia ba mbateʼe tanö yawa imane khöra, ’Bongi daʼa, miröi ndraʼo fefu.’ Imane Fetero, ’Hewaʼae na laröi ndraʼugö niha böʼö, na yaʼodo ba lö uröiʼö.’ Imane Yesu, ’Fatua lö miwo zilatao, no tölu kali öʼosilöʼögö ndraʼo.’

Me laʼohe Yesu ira saradadu ba nomo Gayafa, ato zinengenia si no moloi. Hizaʼi, so darua zinenge soloʼö-loʼö moroi furi. Samösa Wetero ba gotaluania. Möi ia bakha ba golayama nomo Gayafa ba woleu yaʼia ba galitö. Samösa ndra alawe sangai halöwö sangila Fetero imane, ’Uʼila haniha ndraʼugö! Awö Yesu ndraʼugö!’

Imane Fetero, ’Tenga he, lö uʼila haniha niwaʼömö!’ Aefa daʼö, mofanö ia gamaudu mbawa göli. Hizaʼi, so ndra alawe tanö böʼö sangai halöwö sangila yaʼia ba ifatunö ba niha imane, ’Awö Yesu niha daʼa!’ Imane Fetero, ’Lö uʼila haniha Yesu!’ Samösa ndra matua sangumaʼö, ’Yaʼugö samösa moroi ba gotalua zoloʼö Yesu! Moroi ba lagu wehedemö, aboto ba dödögu wa niha Galilaia ndraʼugö simane Yesu.’ Hizaʼi, möi ba hölu Wetero, ’Lö uʼila haniha ia!’

Tefaudu ba ginötö daʼö miwo zilatao. Iʼila Fetero me ibaliʼö ia Yesu ba wamaigi yaʼia. Itörö tödönia wehede Yesu, aefa daʼö mofanö ia baero ba iduhugö wege-ege.

Gasa-gasa daʼö, owulo ndra Sangetuʼö Huku ba nomo Gayafa ba wanguhuku Yesu. Sindruhu wa no lafaʼanö ira wamunu Yesu ba laʼalui lala iadaʼa wamalua daʼö. Hizaʼi, lö lasöndra zala nifalua Yesu. Ba gafuriata, manofu Gayafa khö Yesu, ’Hadia Ono Lowalangi ndraʼugö?’ Imane Yesu, ’Yaʼia.’ Imane Kayafa, ’Lö moguna khöda taʼalui nasa. No iʼoʼaya Lowalangi!’ Fao dödöra fefu na mate Yesu. Latafari Yesu, ladiloi ia ba labugö hörönia. Aefa daʼö, labözi ia ba  lamane, ’Na samaʼeleʼö ndraʼugö, fatunö khöma haniha zamözi yaʼugö!’

Me no irugi laluo, laʼohe Yesu ba nahia Zangetuʼö Huku ba lasofu khönia, ’Hadia Ono Lowalangi ndraʼugö?’ Imane Yesu, ’Atulö, simane niwaʼömi andrö.’ Fasala ia ba wangumaʼöra börö me iʼoʼaya Lowalangi. Aefa daʼö, laʼohe ia ba nomo Wondrio Filato, gubernur Roma. Hadia zalua aefa daʼö? Dataʼalui.