Nakong e nngwe ge Jesu a be a na le baapostola ba gagwe ka phapošing ya ka godimo kua Jerusalema, o ile a re go bona: ‘Ka moka ga lena le tlo tšhaba bošegong bjo gomme la ntlogela.’ Petro o ile a re: ‘Nna nka se go tlogele! Le ge ba ka moka ba ka go tlogela, nna nka se tsoge ke go tlogetše.’ Jesu a re go Petro: ‘Pele kgogo e lla, o tla ba o boletše gararo gore ga o ntsebe.’

Ge mašole ao a bego a swere Jesu a mo iša ntlong ya Kefase, ba bantši ba baapostola ba ile ba tšhaba. Eupša ba babedi ba bona ba ile ba šala mašole ao morago. Yo mongwe wa baapostola bao e be e le Petro. O ile a tsena ka lapeng la ka gare la ntlo ya Kefase gomme a orela mollo. Ka ge mollo o be o dirile seetša, ngwanenyana yo mongwe wa mohlanka o ile a bona Petro gomme a re: ‘Wena ke a go tseba! O mogwera wa Jesu!’

Petro a re: ‘O na le maaka! Ga ke tsebe gore o bolela ka eng!’ Ke moka Petro a tloga moo gomme a ya kgauswi le mojako. Eupša gateetee ngwanenyana yo mongwe gape wa mohlanka a mmona gomme a botša batho a re: ‘Monna yo ke mogwera wa Jesu!’ Petro a re: ‘O na le maaka. Nna Jesu ga ke mo tsebe!’ Monna yo mongwe a re: ‘Ee, o mogwera wa Jesu! Ke kwa ka mokgwa wo o bolelago ka wona gore o tšwa Galilea, o bolela go swana le Jesu.’ Eupša Petro a gana a re: ‘Ke re motho yoo ga ke mo tsebe.’

Ge a fetša go bolela mantšu ao, kgogo ya lla. Jesu a retologa gomme a lebelela Petro. Petro a gopola mantšu a Jesu, ke moka a tšwela ka ntle a fihla a lla kudu.

Ka nako yeo, ditho tša kgoro ya Sanhedrine di be di kgobokane ka ntlong ya Kefase gore di sekiše Jesu. Ba be ba šetše ba kwane gore ba tlo bolaya Jesu, ga bjale ba be ba fo nyaka lebaka la go mmolaya. Eupša ba be ba sa hwetše lebaka la go mmolaya. Mafelelong, Kefase a botšiša Jesu a re: ‘Na o Morwa wa Modimo?’ Jesu a re: ‘Ee, ke nna yena.’ Kefase a re: ‘Re hweditše lebaka la go mmolaya. Motho yo o rogile Modimo!’ Ditho tša kgoro ya Sanhedrine tša dumelelana tša re: ‘Monna yo o swanetše go  bolawa.’ Ke moka ba betha Jesu mo mahlong, ba mo tshwela ka mare, ba mo khupetša sefahlego, ba mmetha gomme ba re: ‘Ge e ba o le moporofeta, re botše gore o bethilwe ke mang?’

Mesong ba ile ba iša Jesu holong ya kgoro ya Sanhedrine gore ba yo mo sekiša. Ba ile ba fihla ba mmotšiša ba re: ‘Na o Morwa wa Modimo?’ Jesu a fetola a re: ‘Lena ka noši le boletše karabo.’ Ke moka ba re o rogile Modimo gomme ba mo iša ntlong ya Kgoši ya Moroma e lego Pontio Pilato. Na o a tseba gore go ile gwa direga eng ka morago ga moo? A re bone.