Etyi Jesus ekahi novalongwa vae mondyuo valingila opasikwa, evepopila okuti: ‘Onwe amuho kounthiki mamunthyipo.’ Petulu ati: ‘Au! Namphila vakuetu vapondola okukusapo, ame nalumwe mandyikusipo.’ Mahi Jesus apopila Petulu okuti: ‘Putyina ekuandambolo lihenepopie, ove mopopi tutatu okuti kundyi.’

Etyi omafualali akuata Jesus aemutuala kondyuo ya Kaifasi, ovanyingi po no apostolu avakahateka. Mahi vevali puvo avalandula movanthu. Umwe puvo o Petulu. Anyingila pepata lio mutumini Kaifasi iya afuene peiko ine potupia. Potupia opo, omukai umwe uundapa mondyuo ya Kaifasi atale Petulu apopi okuti: ‘Ame ndyikwii! Ove ankho una Jesus!’

Petulu ati: ‘Ame, hameko! Etyi ukahi okupopia ame hityi!’ Petulu atundu-po. Mahi pakala vala katutu, amonwa nomukai omukuavo iya apopila ovanthu okuti: ‘Omulume ou ankho ukahi na Jesus!’ Petulu ati: ‘Ame Jesus himwii!’ Omulume umwe ati: ‘Ove, ove umwe puvo! Onondaka mbove mbelifua no mba Jesus, mbulekesa umwe okuti watunda ko Galileia.’ Mahi Petulu akumbulula okuti: ‘Ame himwii!’

Pakala vala katutu, ekuandambolo alipopi. Petulu atale ku Jesus, Jesus nae emutale. Petulu ahinangela onondaka mba Jesus iya aende pondye ahimbika okulila unene.

Omunakwa kumwe novanthu ovakuavo avelipakaila-mo opo vakoyesile Jesus mondyuo ya Kaifasi. Ankho vatokola okuipaa Jesus, mahi opo vemuipae ankho vena okutala inkha una otyipuka alinga tyimuipaesa. Mahi Jesus ankho kalingile natyike tyapenga. Konyima, Kaifasi apulu Jesus okuti: ‘Ove umona umwe wa Huku?’ Jesus ati: ‘Enga.’ Kaifasi ati: ‘Katuesukisile vali okuovola  okutala inkha walinga otyipuka tyimwe tyapenga. Wapenya Huku!’ Ovanthu aveho avati: ‘Omulume ou una okuipawa.’ Avavete Jesus, avemunthili omate. Avemuhiki motyipala otyo vemuveta, avapopi okuti: ‘Mokonda umuuli, pahe popia olie wekuveta?’

Etyi kuatya, avatuala Jesus mondyuo ya Kaifasi avemupulu vali okuti: ‘Ove umona umwe wa Huku?’ Jesus akumbulula okuti: ‘Muene onwe muetyipopia.’ Konyima avahimbika okumutendeleya, avemutuala Kondyuo yomutumini wo Roma utiwa Posiu Pilatu. Oityi valinga vali? Tutalei.