Obu Yesu yaabaire ari n’entumwa ze omu kishengye ky’ahaiguru, akabagira ati: ‘Mwena nimwija kumpemukaho ekiro eki.’ Petero akamugira ati: ‘N’obu abandi boona baraakuhemukyeho, nyowe tindikwija kukuhemukaho.’ Kwonka Yesu akagarukamu Petero ati: ‘Enkoko etakajugire, noija kugira ngu torikumanya emirundi eshatu.’

Abaserukare ku baatwire Yesu omu nju ya Kayaafa, baingi aha ntumwa ze bakahunga. Kwonka babiri ahari bo bakakuratira abantu. Omwe akaba ari Petero. Akahika omu kikaari ky’enju ya Kayaafa yaaza aha muriro kutunga obutagatsi. Omwe aha bazaana akareeba Petero naayota omuriro; yaamwetegyereza, yaamugira ati: ‘Nikumanya. Naiwe obaire ori na Yesu.’

Petero akagira ati: ‘Ngaaha mbaire ntari nawe. Tindikumanya eki orikugamba.’ Akashohora arikuza ow’irembo. Ondiijo omuzaana yaamureeba kandi yaagambira abantu ati: ‘Omushaija ogu abaire ari na Yesu.’ Petero akagira ati: ‘Tindikumanya Yesu.’ Ondiijo mushaija akagira Petero ati: ‘Naiwe obaire ori nawe. Ahakuba omuringo ogu orikugambamu ni nk’ogw’aba Galilaaya, nka Yesu.’ Kwonka Petero akarahira naagira ati: ‘Tindikumumanya.’

Omu kaanya ako, enkoko ekajuga. Petero akareeba Yesu naahinduka kumureeba. Akaijuka ebigambo bya Yesu, yaashohora yaarira munonga.

Bwanyima, ab’omu ishengyero boona, bakaza omu naama; baaboha Yesu, baamutwara, baamuhayo ahari Kayaafa. Bakaba baacwiremu kwita Yesu, kwonka bakaba nibasherura eki baramwiitire. Kwonka bakaba bataine nshonga yoona. Bwanyima, Kayaafa akabuuza Yesu butunu ati: ‘Ori omwana wa Ruhanga?’ Yesu akamugarukamu ati: “Eki waagamba nikwo kiri.” Kayaafa akagira ati: “Yaarogota; nitukyendera ki obuhame obundi.” Ab’omu ishengyero baikiriza bati: ‘Omushaija ogu aine kufa.’ Bakateera Yesu,  baamucwera amacwante aha maisho, baamukoma aha maisho, kandi baamubuuza bati: ‘Ku oraabe ori nabi, tugambire owa kuteera.’

Ku bwabaire eihangwe, bakatwara Yesu omu ishengyero kandi baagaruka baamubuuza bati: ‘Ori Omwana wa Ruhanga?’ Yesu akabagarukamu ati: ‘Nimugira ngu ndi we.’ Bwanyima bakagira ngu naarogota kandi baamutwara owa Pontio Pilaato, omutegyeki wa Rooma. Niki ekyakuratsireho? Ka tukireebe.