Nen kaiba nen Jesus iray apostol to diad samay kuarto ed tagey na sakey ya abung, imbaga tod sikara: ‘Diad sayan labi et taynanan yo ak ya amin.’ Imbaga nen Pedro: ‘Siak andi! Anggano taynan da kan amin, agta ka taynan!’ Balet imbaga nen Jesus ed si Pedro: ‘Antis ya onkukaok so lalong, mamitlo ya ibagam ya agmo ak kabat.’

Nen inawit na saray sundalo si Jesus diad abung nen Caifas, batik iray arum ya apostol. Balet walay duaran apostol ya tinmumbok ed totoo. Sakey ed sikara si Pedro. Linmoob si Pedro anggad sular na abung nen Caifas tan nandangdang ed apoy. Nen aliwawaan so lupa to, sikatoy abirbir na biin lingkor tan inkuan to: ‘Kabat ta ka! Kaiba to ka nen Jesus!’

Imbaga nen Pedro: ‘Andi pa, agko amta tay ibabagam!’ Linmay Pedro ed puerta na sular. Balet anengneng na sakey nin biin lingkor tan imbaga tod saray totoo ya wadman: ‘Kaiba nen Jesus iyan laki!’ Imbaga nen Pedro: ‘Agko kabat tay Jesus!’ Insan walay lakin angibaga: ‘Kaiba to ka! Halata ed panagsalitam ya taga kad Galilea, singa si Jesus.’ Balet impilit nen Pedro: ‘Agko kabat itan a too!’

Tampol ya kinmukaok so sakey ya lalong. Anengneng nen Pedro ya linmingaw si Jesus tan ninmengneng ed sikato. Anonotan nen Pedro imay imbaga nen Jesus, kanian pinmaway tan manakis ya maong.

Legan ya nagagawa iratan, nantitipon so Sanhedrin diad loob na abung nen Caifas pian tepetan day Jesus. Nandesisyon la ra ya pateyen day Jesus, tan manaanap labat ira na rason. Balet anggapoy naromog dan kasalanan to. Kanian direkta lan tinepetan nen Caifas si Jesus: ‘Sika so Anak na Dios?’ Inmebat si Jesus: ‘On.’ Imbaga nen Caifas: ‘Agti la kaukolan so ebidensya. Nadngel yo ya anggapoy respeto tod Dios!’ Kanian nandesisyon so korte: ‘Nepeg ya ompatey iyan too.’ Tinampal day Jesus, nilutdaan da,  pinerengan da, insan da pinoniti, tan imbaga ra: ‘No talagan propeta ka, ibagam pa no siopay namponiti ed sika!’

Nen kabuasan la, inawit day Jesus ed korte na Sanhedrin tan tinepetan da lamet: ‘Sika so Anak na Dios?’ Inmebat si Jesus: ‘Sikayon mismo so mangibabaga a siak so Anak na Dios.’ Kanian say imbaga dan kasalanan to et anggapoy respeto tod Dios. Insan da inawit ed palasyo nen Poncio Pilato, say Romanon gobernador. Anto kasi sinmublay ya agawa? Nengnengen ta.