Altos cuartopi kashasparaqmi Jesusqa apostolninkunata niran: “Kunan tutan llapaykichis saqerpariwankichis”, nispa. Pedrotaq niran: “Llapankuña saqesuqtiykikupas, noqaqa manan saqesaykichu”, nispa. Jesusmi ichaqa niran: “Manaraq gallo waqashaqtinmi kinsa kutita negawanki”, nispa.

Soldadokuna Jesusta Caifaspa wasinman apaqtinkun yaqa llapa apostolkuna ayqekuranku. Ichaqa iskay apostolkunan qatiparanku runakuna ukhupi. Jujninmi karan Pedro, payqa Caifaspa wasinpa pationpin nina qayllapi q’oñikusharan. Jinan juj warmi kamachiqa Pedrota rikuspa niran: “¡Qantaqa reqsiykin, Jesuswanmi kasharanki!”, nispa.

Chaymi Pedroqa niran: “¡Manan paytaqa reqsinichu!”, nispa. Punku ladoman riqtintaq juj warmiñataq runakunata niran: “Kay runaqa Jesuswanmi puriran”, nispa. Pedrotaq niran: “¡Pichá kakunpas!”, nispa. Jinan juj qhariñataq niran: “Qanqa Jesuswanmi kasharanki, pay jinan rimayniykipas”, nispa. Pedrotaq jurasparaq niran: “¡Manan reqsinichu!”, nispa.

Chay ratopin juj gallo waqamuran. Pedrotaq rikuran Jesús payta qhawamushasqanta jinan yuyariran Jesuspa nisqanta. Jinaspa jawaman lloqsispa khuyayta waqaykuran.

Chaykaman juezkuna juñukuranku Jesusta juzganankupaq. Rimanakurankuñan Jesusta wañuchinankupaq, chaypaqmi ichaqa llulla testigokunata maskharanku. Ichaqa manan imamantapas tumpayta atirankuchu, jinan Caifasqa Jesusta tapuran: “¿Qanchu Diospa Churin kanki?”, nispa. Jesustaq niran: “Arí, noqan kani”, nispa. Chaymi Caifasqa niran: “¡Diostan k’amishan!”, nispa. Llapa juezkunataq niranku: “¡Kay runaqa wañunanmi!”, nispa. Jinan ch’aqlaranku, thoqaykuranku, ñawinta tapaspataq saqmaranku,  nirankutaq: “Profeta kanki chayqa, niwayku pichus saqmashasunki chayta”, nispa.

P’unchayamuqtinmi Jesusta aparanku juezkunaq juzgananku salaman, jinaspa wajmanta tapuranku: “¿Qanchu kanki Diospa Churin?”, nispa. Jesustaq niran: “Arí, qankuna kikiykichismi nishankichis”, nispa. Jinan niranku: “Diostan k’amin”, nispa. Jinaspa Poncio Pilato kamachikuqman aparanku. ¿Iman chay qhepaman pasaran? Qatimuqpi yachasun.