Андэ послиднё пэско вэчэро о Иисусо сас пэстирэ апостолонэнца, во ԥэндя лэнди: «Адес и рят тумэ всаворэ ашавэна ман». О Пётро зацыписайля: «Кати най мэ! Сар всаворэ ашавэна, мэ никала на ашавава тут». Но о Иисусо ԥэндя лэ Петрости: «Дэкин на процыпия о башно, ту тривар ԥэнэса, кай на ӷанэс ман».

Кала и воиноря андярдэ лэ Иисусос каринг о Каиафа, почти всаворэ апостолоря рознашлэпэ. Но дуй апостолоря жылэ пала мануша, савэ залинэ лэ Иисусос. Ек андар лэндэ сас о Пётро. Во зажыля андэ лэ Каиафостири града и ля тэ татёл паша яг. Паша яг и служанка ӷатярдя лэ Петрос и ԥэндя: «Мэ тут ӷанав! Ту санас лэ Иисусоса!»

О Пётро ԥэндя: «Най, када най мэ! Мэ на полав, пала со ту дэс дума!» И после када, во ля тэ жал каринг и вороты. Но тоди лэс додиқля авэр служанка и ԥэндя аврэнди: «Кадэва мануш сас лэ Иисусоса!» О Пётро зацыписайля: «Мэ даже на ӷанав лэ Иисусос!» Ек мануш ԥэндя: «Ту ек андар лэндэ! Па кода, сар ту дэс дума дицол, кай ту анда Галилея, кадя жэ сар о Иисусо». Но о Пётро дя солах: «Мэ на ӷанав лэс!»

Андэ кодэя время процыписайля о башно. О Иисусо банделя и подиқля по Пётро. Тоди лэ Петрости динэ андо шэро лэ Иисусостирэ алава. Во вижыля и фартэ заровдя.

ҬАндэ кодэя время, и сындомаря, савэ слинэ андэ иудейско сындо Синедрионо, стидэпэ андэ лэ Каиафоско цэр, кай тэ сындон лэ Иисусос. Вонэ уже гиндонас тэ умарэн лэ Иисусос и важ када родэнас андэр со тэ приастарэн лэс, кай када тэ стерэн. Но вонэ на виарақлэ андэр со лэс тэ дошалярэн. И акэ о Каиафа ворта пушля кай о Иисусо: «Ту лэ Дэвлэско Шаво?» О Иисусо ԥэндя: «Да». О Каиафа ԥэндя: «Амэнди будэр нико на трэбуй, кай тэ доԥэнэн, кай во дошало. Када найлашэ алава по Дэл!» О сындо ԥэндя: «Кадэлэс манушэс трэбуй тэ умарэн». Вонэ линэ тэ марэн лэ Иисусос пар мостэ и тэ шунгардэн пэр  лэстэ. Вонэ заԥанглэ лэстирэ яқа, марэнас лэс и ԥэнэнас: «Сар ту мануш, саво пэрэдэл лэ Дэвлэстирэ алава, ԥэн амэнди, ко дядап тут!»

Кала авеля о дес, вонэ одындярдэ лэ Иисусос андо Синедрионо и упалэ пушлэ: «Ту лэ Дэвлэско Шаво?» О Иисусо ԥэндя лэнди: «Тумэ екжэнэ ԥэнэн, кай када кадя». Тоди вонэ дошалярдэ лэс, кай во ԥэнэн найлашэ алава по Дэл, и одындярдэ лэс андо дворцо, кай о Понтий Пилато, саво сас римско баро мануш. Ай со тердяпэ после када? Уӷанаса май англэ.