Pikhali Yezu na apostolo n’kwartu yandzulu, apanga apostolo ace: ‘Imwe monsene munadzandisiya pakati pa masiku.’ Pedhru alonga: ‘Ine nkhabe! Ngakhale anango akusiyeni, ine cipo ndinakusiyani.’ Mbwenye Yezu apanga Pedhru: ‘Dzongwe mbidzati kulira, unadzalonga katatu kuti nee usandidziwa.’

Pidakwatwa Yezu na anyankhondo mpaka kunyumba kwa Kayifa, apostolo azinji athawa. Mbwenye awiri mwa iwo atowerera pakati pa mwinji. M’bodzi mwa iwo akhali Pedhru. Iye aenda panyumba ya Kayifa mbaotha moto. Namasiku, bitcu m’bodzi wantsikana ayang’ana Pedhru mbalonga: ‘Ndisakudziwa! Ukhali pabodzi na Yezu.’

Pedhru alonga: ‘Nkhabe, nee ndikhali na iye! Ine nkhabe dziwa pinalonga iwe!’ Iye aenda dhuzi na pansuwo. Mbwenye mwakukhonda dembuka bitcu unango wantsikana amuona mbapanga mwinji: ‘Mamuna uyu akhali na Yezu!’ Pedhru alonga: ‘Ine nkhabe kundziwa Yezu!’ Mamuna unango alonga: ‘Iwe ndiwe m’bodzi wawo! Malongero ako akhala ninga a ku Galileya, ninga Yezu.’ Mbwenye Pedhru adumbira: ‘Ine nkhabe kundziwa!’

Pa ndzidzi unoyu, dzongwe yalira. Pedhru aona Yezu mbakamuyang’ana, natenepa akumbuka mafala akhadalonga Yezu. Iye abuluka panja mbalira kakamwe.

Pa ndzidzi unoyu, nkulu wa anyantsembe na amuna anango akufunika agumanyikana toera kutonga Yezu panyumba ya Kayifa. Iwo akhadatonga kale toera kupha Yezu, na thangwi ineyi akhasaka mathangwi toera aphiwe. Mbwenye iwo nee akwanisa kunyerezera cinthu cakuti mbadakwanisa kumpambizira. Pakumalisa, Kayifa abvundza Yezu: ‘Iwe ndiwe Mwana wa Mulungu?’ Yezu atawira: ‘Inde.’ Kayifa alonga: ‘Nee tisafuna pontho umboni unango. Iye atikana Mulungu!’ Anyakutonga atawira: ‘Mamuna uyu asafunika kuphiwa.’ Iwo aphulira mata Yezu, aphimbira  maso ace, pontho am’menya, mbalonga: ‘Khala ndiwe mprofeta, tipange mbani akumenya!’

Pidaca kunja, Kayifa na amuna anango akufunika agumanyikana mbabvundza pontho Yezu: ‘Iwe ndiwe Mwana wa Mulungu?’ Yezu atawira: ‘Imwe mukulonga kuti ndine Mwana wa Mulungu.’ Natenepa, anthu aona kuti Yezu atikana Mulungu, na thangwi ineyi ankwata kuenda naye ku thando ya Ponsyo Pilato, ntongi Waciroma. Ninji pidacitika patsogolo pace? Tende tione nsolo unatowera.