A o iai Iesu ma ona aposetolo i le potu pito i luga, na ia faapea atu iā i latou: “Tou te tuua aʻu i lenei pō.” Na tali mai Peteru: ʻE tusa pe tuua oe e i latou uma, ae ou te lē tuua lava oe.’ Ae na faapea atu Iesu iā Peteru: ʻA o leʻi vivini le moa, o le a faatolu ona e faafiti e te lē iloa aʻu.’

Ina ua ave e fitafita Iesu i le fale o Kaiafa, o le toʻatele o le ʻauaposetolo ua sosola i le taimi lea. Ae e toʻalua aposetolo na mulimuli atu i tagata. O se tasi o na aposetolo o Peteru. Na ia alu atu i le lotoā o le fale o Kaiafa, ma nofo i autafa o se afi ma faamāfanafana ai o ia. O le malamalama o le afi na iloa atu ai e se auauna teine ona foliga ma faapea atu: ʻOu te iloa oe. Sa e faatasi ma Iesu.’

Na tali mai Peteru: ʻE leai. Ou te lē iloa le mea o loo e fai mai ai.’ Na alu atu o ia i le faitotoʻa, ma e leʻi umi ae iloa atu o ia e se isi auauna teine ma faapea atu i tagata: “Sa faatasi lenei tagata ma Iesu.” Na tali mai Peteru: ʻOu te lē iloa Iesu.’ Na faapea atu se tasi tamāloa: ʻO oe o se tasi na faatasi ma ia. Ou te iloa i le auala e te tautala ai o oe o se tagata Kalilaia e pei o Iesu.’ Ae na tautō atu Peteru: ʻOu te lē iloa o ia.’

O le taimi lava lenā na vivini ai se moa. Na iloa e Peteru le faliu atu o Iesu ma tilotilo atu iā te ia. Na ia manatua ai upu a Iesu, ona alu lea o ia i fafo ma ua tagi masūsū.

O le taimi lea o loo fono alii uma o le Faamasinoga Sili ina ia molia Iesu i le faamasinoga i le fale o Kaiafa. Ua uma ona latou filifili e fasioti Iesu, a o lea ua latou saʻilia se māfuaaga e fasioti ai o ia. Ae e latou te leʻi maua se mea e molia ai o ia. O lea, na fesili saʻo atu ai Kaiafa iā Iesu: ʻPo o oe o le Alo o le Atua?’ Na tali mai Iesu: “O lea lava.” Na fai atu Kaiafa: ʻE lē toe manaʻomia nisi faamaoniga. Ua upuleaga o ia i le Atua.’ Na lagolagoina e le faamasinoga lenei faaiʻuga: ʻE tatau ona oti lenei tagata.’ Na latou tapō Iesu, tuufeanu iā te ia, ufiufi ona fofoga ma tatuʻi iā te ia ma faapea atu: ʻPe afai o oe o se perofeta, taʻu mai po o ai na pōina oe.’

 I le taeao o le aso na sosoo ai, ona latou ave lea o Iesu i le maota o le Faamasinoga Sili ma toe fesili atu iā te ia: “Po o oe o le Alo o le Atua?” Na tali mai Iesu: ʻO lenā ua outou fai mai ai.’ Ona latou molia lea o ia i le upuleaga ma ave o ia i le maota o Ponotio Pilato le kovana o Roma. O le ā le mea na sosoo ai? Seʻi o tatou vaai.