Di Yesus ben de nanga den apostel fu en na ini a sodrokamra, a taigi den: ’Un alamala o gowe libi mi tideneti.’ Petrus piki: ’Mi no o gowe libi yu! Awinsi ala den trawan gowe, mi no o gowe.’ Ma Yesus taigi Petrus: ’Fosi wan kakafowru bari, yu o taki dri leisi taki yu no sabi mi.’

Di den srudati teki Yesus tyari go na a oso fu Kayafas, furu fu den apostel lon gowe. Ma tu fu den no gowe. Den waka na ini a grupu di ben e tyari Yesus gowe. Wan fu den na Petrus. A waka go te na ini a dyari fu Kayafas, ne a go sidon waran en skin na wan faya. Na ini a leti, wan fu den umasrafu si Petrus fesi èn a taki: ’Mi sabi yu! Yu ben de nanga Yesus!’

Petrus piki: ’A no tru! A no mi! Mi no sabi fu san yu e taki!’ Dan Petrus waka go na a sei fu a portu. Ne wan tra umasrafu si en, dan a taigi den sma: ’A man disi ben de nanga Yesus!’ Petrus piki: ’Mi no sabi Yesus srefisrefi!’ Wan man taigi en: ’Yu na wan mati fu a man! Yu e taki leki den sma fu Galilea pe Yesus komoto.’ Ma Petrus sweri taki a no sabi Yesus.

Wantewante wan kakafowru bari. Petrus si fa Yesus drai luku en. A memre san Yesus ben taki, ne a go na dorosei, dan a bari krei.

Na a momenti dati, a Sanhedrin, dati na a krutubangi fu den Dyu, ben e seti sani fu krutu Yesus na ini na oso fu Kayafas. Den ben bosroiti kaba taki den ben o kiri Yesus, ma now den ben e suku wan reide fu du dati. Ma den kon si taki a no du nowan ogri. Te fu kaba Kayafas aksi Yesus langalanga: ’Yu na a Manpikin fu Gado?’ Yesus piki: ’Iya.’ Kayafas taki: ’Wi no abi moro buweisi fanowdu. Unu yere fa a e kosi Gado!’ Ne ala den krutuman taki: ’A man disi musu dede.’  Wan tu fu den bigin naki Yesus, den spiti tapu en, den tapu en fesi, dan den naki en nanga kofu. Den taigi en: ’Efu yu na wan profeiti, dan taigi wi suma naki yu!’

Di dei opo, den teki Yesus tyari go na a presi pe a Sanhedrin e hori krutu, dan den aksi en baka: ’Yu na a Manpikin fu Gado?’ Yesus piki: ’Unsrefi e taki dati mi na a Manpikin fu Gado.’ Ne den feni taki a kosi Gado. Dati meki den tyari en go na a palèisi fu Pontius Pilatus, a tiriman fu Rome. San pasa baka dati? Meki wi go luku.