Ngesikhatsi Jesu anebaphostoli bakhe ekamelweni lelisetulu, watsi kubo: ‘Kulobusuku balamuhla, nonkhe nitangishiya.’ Phetro watsi: ‘Ngaphandle kwami! Ngisho nobe bonkhe laba labanye bangakushiya, mine ngeke ngize ngikushiye!’ Kodvwa Jesu watsi kuye: ‘Lichudze lingakakhali, utawube sewungiphike katsatfu.’

Ngesikhatsi emasotja amikisa Jesu kuKhayafase, labanye baphostoli bakhe babaleka. Babili kuphela labachubeka bamlandzela nalesicumbi sebantfu. Lomunye wabo bekunguPhetro. Wahlala ebaleni ekhaya laKhayafase futsi wotsa umlilo. Asehleti lapho, intfombatana lesisebenti yambona Phetro yase itsi: ‘Ngiyakwati wena! Nawe bewuhamba naloJesu!’

Phetro watsi: ‘Cha, angikaze. Angati kutsi ukhuluma ngani.’ Wasuka lapho. Asahamba aya ngasegedeni lenye intfombatana lesisebenti yambona futsi yatsi: ‘Lona naye abenaloJesu.’ Phetro watsi: ‘Ngicinisile, angimati lomuntfu!’ Lenye indvodza yatsi: ‘Vele nawe ungulomunye wabo, ngobe ecinisweni nekukhuluma kwakho kuyakuceba kutsi uwaseGalile njengaJesu.’ Phetro wagcizelela watsi: ‘Ngicinisile, angimati lomuntfu!’

Ngekushesha lichudze lakhala. Phetro wabona Jesu agucuka ambuka. Wakukhumbula loko Jesu bekakushito, futsi waphumela ngephandle wakhala kabuhlungu.

Ngaleso sikhatsi emaJuda angenisa Jesu endlini yaKhayafase ambuta imibuto. Besekavele ati kutsi atambulala Jesu, kodvwa abefuna sizatfu sekumbulala. Amtfola ete licala. Khayafase wase ubuta Jesu utsi: ‘UyiNdvodzana yaNkulunkulu yini?’ Jesu watsi: ‘Yebo.’ Khayafase watsi: ‘Sisabadzingelani-ke labanye bofakazi? Nani nimvile asetfuka.’ Bonkhe bavumelana batsi: ‘Lomuntfu kufanele abulawe.’ Bacala kumkhafulela,  bammbonya buso, futsi bamshaya ngetibhakela, batsi: ‘Phrofetha! Ngubani lokushayile?’

Ngelilanga lelilandzelako ekuseni, bamikisa Jesu eNkantolo yemaJuda bafike bambuta batsi: ‘UyiNdvodzana yaNkulunkulu yini?’ Jesu waphendvula watsi: ‘Senivele nishito kutsi ngingiyo.’ Ngako bambeka licala lekutsi ubetfukile base bammikisa kuPhontiyuse Pilatu umbusi waseRoma. Kwase kwentekani? Asesibone.