Pa nyengu yo Yesu wenga ndi akutumika muchipinda chapachanya, wanguŵakambiya kuti: ‘Mosi mundisiyengi ndija ndi usiku.’ Petro wangumuka kuti: ‘Ini cha! Chinanga kuti anyangu wosi angakusiyani, ini ndikusiyeningi cha.’ Yesu wangukambiya Petro kuti: ‘Tambala wechendaliyi undikanengi katatu.’

Asilikali ŵati aluta ndi Yesu kunyumba yaku Kayafa, akutumika anandi ndipu athaŵa kali. Akutumika ŵaŵi ŵenga limoza ndi chigulu cha ŵanthu ndipu amulondonga. Yumoza mwa akutumika yaŵa wenga Petro. Iyu wanguluta mubwalu la nyumba yaku Kayafa ndipu wawothanga motu. Chifukwa cha ukweru, muteŵeti munthukazi wanguwona Petro ndipu wangukamba kuti: ‘Ndakuziŵa! Wenga ndi Yesu!’

Petro wanguti: ‘Awa ndenga nayu cha! Nditiviziŵa cha vo ukamba!’ Iyu wangusoka kuluta kugeti. Pati pajumpha kanyengu kamanavi, muteŵeti munyaki munthukazi wati wamuwona, wangukambiya ŵanthu kuti: ‘Munthu uyu wenga ndi Yesu!’ Petro wangumuka kuti: ‘Nditimuziŵa cha ini Yesu!’ Munthurumi munyaki wanguti: ‘Ndiwi yumoza wawu! Mo ulongolore uwoneka kuti ndiwi wa ku Galile nge Yesu.’ Kweni Petro wangulapa kuti: ‘Nditimuziŵa cha!’

Nyengu yeniyo, tambala wanguliya. Petro wanguwona Yesu waching’anamuka ndi kumuleresa. Iyu wangukumbuka mazu ngaku Yesu ndipu wangutuliya kubwalu. Petro wanguliya ukongwa.

Pa nyengu iyi, mphara yikulu ya milandu ya Sanihedirini, yingukoliyana kuti yimufumbi mafumbu Yesu kunyumba yaku Kayafa. Yiwu ndipu apangana kali kuti amubayi Yesu sonu akhumbanga kusaniya chifukwa. Kweni atondekanga kuchisaniya. Pakumaliya, Kayafa wangufumba Yesu kuti: ‘Kumbi ndiwi Mwana waku Chiuta?’ Yesu wangumuka kuti: ‘Ndini.’ Kayafa wanguti: ‘Tikhumbika so ukaboni unyaki cha. Uku nkhunyoza Chiuta!’ Mphara yo yati yakoliyana yingukamba kuti: ‘Munthu uyu watenere kubayika.’ Yiwu angumuwomba makofi, angumufunyiya mata, angumujala kumasu ndi kumupuma ndipu anguti: ‘Asani ndiwi mchimi, tikambiyi yo wakupuma!’

Kwati kwacha, yiwu angutole Yesu ku mphara ya Sanihedirini ndi kumufumba kuti: ‘Kumbi ndiwi Mwana waku Chiuta?’ Yesu wangumuka kuti: ‘Mukamba ndimwi kuti ndini.’ Pavuli paki angumusaniya ndi mulandu kuti wangunyoza Chiuta ndipu anguluta nayu ku nyumba yachifumu yaku Pontio Pilato, yo wenga nduna ya Aroma. Ntchinthu wuli cho chinguchitika pavuli paki? Tiyi tiwoni.